摺衫

Mon姐今日先至的起心肝收埋d夏天衫，雖然我地買咗塊摺衫板，但係我都自告奮勇，用我嘅方法，好快咁幫Mon姐摺好晒d夏天衫：

(1)一堆衫

(2)反轉灘開一件衫

(3)放上一塊板，我就用咗個透明快佬

(4)左摺

(5)右摺

(6)上摺

(7)反轉

(8)取出快佬

(9)攪掂

(10)就係咁，一叠整整齊齊嘅衫就摺好

2012聖誕Party

維多利亞幼稚園Friend Club聖誕Party今年第........唔記得第幾年喇！不過根據我地個『紅男綠女大比拼』盾牌顯示，



紅男綠女大比拼係由1992年開始，咁再之前嘅美食大賽、才藝比賽等等，應該第廿幾年喇！



今年嘅Party好特別，因為一個幼稚園同學仔都無。有移咗民、有結咗婚、有拍緊拖、有響上海做緊野.......但係都無減我地嘅興致，其中大小姐同玲玲姐仲粉墨登場扮晒『西洋菜』，差d 6埋佢地黎食。











新會員：Brownie

漫步九龍城

以前同3叔姐行完街多數坐小巴送佢返屋企，途經九龍城，所以對九龍城都有d感情。加上結婚響獅子石道1號當年嘅富榮華酒樓擺酒（揀富榮華係因為當時大舅爺響果度做董事總經理），今日專登坐車去行下。富榮華酒樓已經變咗一棟大廈了。

天寒地凍，拖住手行下睇下，食咗大菜糕，又去咗黃明記食雙丸河........仲有d拍拖feel！

讚!讚!讚!3叔姐

3叔姐早前決定安裝浴室寶純粹為家人著想，而且時間剛剛好，響e幾日寒冷氣溫底下，我地沖涼不至冷親，更有足夠時間查cream，皮膚不至太乾。

提起乾燥，3叔姐又托朋友上網買咗個放濕機。以前都試過用放濕機，都唔滿意，e個我就好鍾意，因為佢用火牛DC電好安全，佢超細易收藏，佢無儲水樽，隨便一個蒸餾水樽就用得。



所以今次要讚!讚!讚!3叔姐，咁為家人著想，我送番個心比佢。

都係落番好d！

最近聽Mon姐同飛吻講有一次澳門遊都幾好笑。

話說佢地一班人去到澳門搵好野食，結果入咗一間標榜『 絕無味精 』嘅舖頭食翅，事頭婆見佢地人多，親自送上翅煲，又一面鄭重說明佢地唔落味精。

當Mon姐同飛吻一啖翅食入口，唉！兩人互望一眼，心領神會咁話：『都係落番好d！』

用電爐安全d

寒冷天氣蒞臨，相約上朋友家打邊爐，不過差d出事，因為gas爐著唔到火，到著到時台面有d氣未散，結果突然一台面都係火，好彩只係一剎那，只係燒穿膠台布。下次都係用電爐安全d。

今晚d食物都好正，可惜我4高，忍！牛肉都無食！

好習慣，比人讚

每朝早都去同一個酒樓食早餐，伙記及部份茶客都熟口熟面。

某日朝早如常上到酒樓，未坐埋位一個部長見到我就同一個熟客講：『佢好乾淨架！』，跟住我坐低，佢再講埋落去，佢話：『佢好乾淨架，佢食完個位台布都唔使換架！』原來係咁！

出街飲茶食飯我都習慣食得乾淨，乾淨包含夾咗埋黎食得嘅都食晒佢and小心唔好弄污台布，我自己舒服，人地執台又開心，幾好架！

送呔

平時甚少買呔，買咗往往一打就10幾年，最近有朋友送咗一條呔比我，我一睇，咁嘅色，自己就多數都唔會買啦！不過當打咗條新呔返工，竟然個個話好睇。多謝晒送呔比我個朋友！

夜晚行工展會

今年又揀夜晚行工展會，貪佢人少，睇都睇得舒服d。而且趁未凍早d行，遲d轉凍，你行埋我份

Kusatsu 日本草津 浴室寶

3叔姐見朋友裝咗個浴室寶，於是去港燈家電中心了解一下，然後一家人又研究下，終於都係裝，連安裝<$3,000。

剛好天日可能降到12度，沖涼就唔使咁凍、水又唔使咁熱，對皮膚好d.......

安裝好容易，拆咗抽氣扇，界開玻璃就裝，位置fit到漏！







http://builtinpro.hk/kusatsu/kbf-231shahwd

東方歌藝團

今晚係5年黎第3次睇東方歌藝團。佢平均每兩年先至做一次，以前唔識睇，錯過機會，e家一做就睇，睇得一年得一年，因為楊燕、青山、謝雷、張帝等台柱已經平均70，我驚少一個就少一個。

今晚有胡美儀（56）、冉肖玲（63）、謝雷（快70）、楊燕（快70）、張帝（71），前兩位唔講喇，因為我買飛入場係為咗睇：謝雷嘅夜空 and苦酒滿杯、楊燕嘅一朵小花、蘋果花 and 王昭君、張帝嘅攪笑，張帝71歲，佢嘅歌好聽過無數嘅所謂歌星，更加想唔到，佢今晚唱 Unchanged Melody唱到好似 BeeGees上身。

今晚入場都好多笑料，例如坐我身邊一班觀眾：平均75，佢地行為包括：

• 咳
• 乞痴
• 隨意講野
• 踢我椅背
• 跟住唱但係走晒音
• 拍手但係唔夾拍子
• 搽白花油
• 翻譯（佢以為人地唔識聽國語，佢句句都翻譯成廣東話比隔離聽）
• 去廁所（無可厚非，因為7:30唱到11:30今次無半場休息）
• 傾計
• 批評
• 係又笑唔係又笑（自從張帝出場之後。其實張帝次次都係講果堆笑話）
• 最勁係當台上一支射燈長時間射正我地時，班老人家就高聲媽义投訴、嘈到支燈射去第處為止..........

我個位響山頂嘅上面，高過中間大電視同d吊燈，所以係完全睇唔到歌星個樣.......

禮物

聖誕未到已經收到第一份禮物。e份禮物好豐厚，厚得有d意外，不過我唔去衡量禮物嘅價值喇，我只會多謝送禮物嘅人果番心意。

其實“聖”誕就已經係一份無可比擬嘅禮物，意外得無可能以人類嘅智慧去想象，佢無價，但係有愛；佢付出，但係無指望回報。










希望人人都收到聖誕禮物！