3叔公BLOG: 4月 2014

2014年4月27日星期日

3叔姐學整錦鹵雲吞

3叔姐響電燈公司家政班學咗整錦鹵雲吞，似模似樣喎。

炸雲吞入面都有料架，係蝦膠

e碟係上堂時影，因為我唔好食魷魚，所以自己煮就無落

多謝3叔姐！

- 完 -

"Sister"唔係修女咁解，而係我堂家姐嘅 nick稱。

做得我堂家姐，人生經歷同年紀都比我大，佢已經有兩個孫，估唔到，佢仲可以響今日受浸，當住家人、朋友、教會面前承認耶穌係佢嘅救主！

通常咁嘅年紀，特別係男人，都唔肯「信」！以為乜都可以自己解決，所以，Sister，你好野！

有哥、阿成、老寧、老健、老強、老泰......各位未信嘅家人，希望Sister嘅受浸，佢嘅改變，佢嘅行為可以啟發你地！唔好咁硬頸，人算甚麼？福音一次又一次臨到你地面前，要把握喇！

第一次出席恩福嘅浸禮

- 完 -

重遊“和勝記工業大廈”及官塘碼頭

1977年暑假，同老強、老寧3個去到官塘搵暑期工，路經偉業街一間工廠大廈門口，睇見樓上有製衣廠（東南製衣廠）請雜工，於是上去問。老闆（老伍仔）見到我地，話只請一個，我話：唔得喎，一係唔請，一係請晒3個。旁邊有個好似幾話得事嘅人（馬Sir）話：請晒3個啦！都有野做嘅！於是老伍仔話：$18蚊日，做唔做？我地話：做！

東南製衣廠專做牛仔褲，分寫字樓同工場兩部份。寫字樓負責人事、會計、行政......唔講喇；工場負責製造，有好多個部門，有d部門用判頭制，判頭帶班人黎開工，逐批貨同老闆計錢，例如：裁床、埋夾、耳仔\扭門\打棗、熨床、剪線頭等等；車間用車位女工就逐件計，有單針、雙針之分，負責車褲頭、車袋、車腳等等，手腳快都幾好人工架！不過有個職位叫車間指導員，馬Sir就係喇，月薪制。負責計劃同控制成批牛仔褲嘅制作、流程同方法，技術少d都做唔到。

我地做咗半個月，去到1977年7月1日，有位新同事返工，準備代替馬Sir，因為馬Sir已經辭咗職。於是e位新同事就變成咗我地3個嘅上司，叫我地做乜就做乜！

暑假完老強入咗HKU，老寧同我就相繼入咗老電，而東南製衣廠亦結束業務，所有人各散東西，除咗我同果位1977年7月1日識嘅上司 , 仲響埋一齊 - 上司就係3叔姐！

今日同3叔姐響官塘食完早餐，即時興起：舊地重遊。

我連大廈名都要問老寧至記得

以前個入口好舊架

已經裝修過晒

上埋去睇下仲有無回憶，不過連幾多樓都唔記得

除咗個大廈名無變，乜都唔同晒！

轉右間Texwood 仲響度

巧明街？淨係記得個名

沿途行去官塘碼頭想話尋找回憶，原來有個海濱公園好靚

望住郵輪碼頭

已經多咗條橋

e個係當年人山人海嘅官塘碼頭

暫時得我地兩個

以前坐船見到飛機，e家見到郵輪碼頭

環境變晒喇！不過記憶仍在！

- 完 -

2014年4月24日星期四

遺憾

Yahoo d 舊 blog 終於無被搬過黎！係我自己 set 錯野？定係 Yahoo問題？曾經上Yahoo FB求Yahoo 幫忙，但無反應。

無心機！

唯有將部份 save 咗做 WORD format 嘅 blog copy 翻生.......

2014年4月22日星期二

希俊@ 維多利亞公園

如果佢第日成為著名足球員，e張相就珍貴了

當大家響度討論希俊第日大個仲記唔記得我地、第日佢會響邊度讀書、會響邊度住…但當佢黎咗香港，我地就想見佢，見得一次得一次，理得第日會點！好似今個復活節假期，4日見咗佢3日。

e位小朋友好有個性：熱情但係易放易收、任性但係聽教聽話！好似好矛盾，不過…例如：佢可以同每一個人玩，如果事先通知佢，幾多分鐘之後要走喇，就算當時玩到唔停得，幾分鐘之後話走就走；又例如：佢鍾意四圍走摸e樣摸果樣，不受拘束，但係過馬路佢實比大人拖！

今日第一次帶佢去維園：