政改

好唔想在此談政治，第一唔識，第二各人想法唔同，實有人贊成有人反對，如果遇到激烈者反對洗我BLOG就麻煩。但係見今晚d 80後咁辛苦，又想勸勸佢地保重。

身為一個選民，其實你的意願已交比你選的議員代你發言或者投票，如果佢唔稱職，下次選第個啦，又唔稱職又選下一個，甚至你自己去選都得，何必......睇見佢地好辛苦。

好多聲音話取消功能組別，我唔讚成，因為功能組別可以制衡直選議員，如果全部60席都直選，就好有機會好似泰國咁，市民被某d人仕利用去投票，何況香港好多人可以接受食完海鮮去遊行依一套。所以有功能組別可以有各種不同業界聲音，但，一定要監控依班人，無得唔出席，出席又唔投票，投票又投棄權.......又唔提議案，政府要佢點佢就點，好似某議員今晚比人鬧"走狗"咁。好多議案都係因為分組點票過唔到。

民主黨的改良方案我唔鍾意，但係好過唔郁。依家佢成日比人鬧，但鬧人者有無更好方案？鬧人幾咁易，幫人就好難。如果無依個改良方案，今年個政改又會被推倒，政府理得理，過唔到就賴你，到2015年佢又係推依個方案出尼.......

我以前次次選李柱銘，但如果今次佢真係退黨，我覺得佢輸打贏要唔應該。世界上好多唔係你要咁就咁，好似華叔咁，佢可以唔要cancer咩？

我好欣賞黃毓民，佢d野熟，反應快，有point，但如果佢用d廣為人接受同有涵養d而又可以達到目的既方法就最好。

余若微贏特首辯論贏得好清脆，兩個我選我會選佢做特首，但如果多幾個又未必.....其實選邊個都好，最緊要係個制度，好似美國，選左一個總統，大家就接受個遊戲規則，用心去監察你，幫你，攪好個政府，無話成日叫佢未做完就落台，佢做滿4年做得唔好自然無人再選佢啦，而且8年就無得連任。

夜喇，瞓喇！