北上火車團

83年組團北上，由廣州坐火車，經長江、黃河，到達河北省，然後轉西入山西省，再北上內蒙古自治區，十幾日遊覽咗北京、恆山、懸空寺、大同雲崗石窟等，揸住地圖指南針，帶住3個女仔，想番起都覺得“勇”。當時又無話有GPS，又無上網預訂酒店車票，又無手提，除咗勇，我都幾夠膽，但係又唔夠果3個女仔夠膽喎！起碼佢地夠膽跟我去。

內蒙4月開始溶雪，草原又未長出，所以周圍都灰灰黃黃

懸空寺，北魏時期開始興建，1400幾年歷史，有40幾間房間，大部份房間建在橫木上........

雲崗石窟，又係北魏時期開始興建，當時佛教盛行，所以大興土木，興建同佛有關嘅建築

恆山水壩，水面結咗冰

恆山上民居

今次終於帶住自己相機上陣，可惜，仲帶埋幼嫩嘅攝影技術，d相一d都唔靚，又係一次side料嘅經驗。最失敗係響嚴寒天氣下唔識保護相機電，攪到影一陣就無電，放入衫內暖一陣再影，影一陣又無。

乜野叫人山人海？ 一個清明節紀念活動

返到北京四圍行，居然可以入人民大會堂，仲做埋香港區代表，扮開會

人民大會堂內嘅國宴廳，延開500席，每席坐10人，又可以入，我地4個仲每人上台講咗幾句說話.....

e 次行程好難忘，每次想起都有零零碎碎回憶浮出黎 :

• 買咗北京往大同硬坐火車票，一上車居然已經有人瞓咗我地個位， 搵車務員出馬叫佢走，佢起身，瞓入我地凳底，原來佢買咗企位飛
• 響內蒙有個節目係參觀民居，主人家好客氣，抱隻羊仔比我地玩，但係響內蒙，飲羊奶茶，食全羊宴，食手抓肉，抱住隻羊都有d內疚
• 響懸空寺，買入場券後要跟住一個人行，個人一路行一路講解懸空寺歷史，之後參觀完佢話：每人收五毫子講解費！
• 響北京住咗間賓館，浴室有浴缸，浴缸有3隻腳，加兩舊磚頂住
• 坐京廣鐵路，途經各省各市站站停，坐咗32個鐘，但係一到站都有幾分鐘時間落車買野食同影相
• 坐京廣鐵路硬卧，近廁所，有一朝被“擦擦擦擦” 聲嘈醒，心諗：邊個咁早洗波鞋呀？點知原來係一個國內同包擦緊牙
•  
•  
•