一次精彩絕倫的跟蹤任務

剛剛發表完『香港國家地質公園』(3) 之西貢市集，又令我想起一段同西貢有關嘅往事。我叫e段往事做『一次精彩絕倫的跟蹤任務』。

日期： 20幾年前某個星期日

人物： 3叔公、哈公、哈女（哈公老婆）、哈女個女、少女（全部假名）

任務： 哈女發現哈公近期行為古怪，間唔中星期日都話同朋友行山，早一晚就準備好衣物，第二朝7點前就出門口。於是委托3叔公跟蹤哈公，睇下佢去邊。

難度： 極高，因為哈公係認識3叔公嘅、當年無手提電話同埋真係唔知佢去邊！

過程：

早一晚哈女call 3叔公，話哈公又響度準備衣物，好有機會聽日出動；

於是3叔公第二日，6點3企響佢地灣仔屋企樓下等。企響度等，落住雨擔住遮等；

果然，6點9哈公出現，天助我也，因為擔住遮，佢一定睇我唔到；

哈公筆直往灣仔地鐵方向行，但係甚有警覺性，因為擰過幾次頭望後面；

由踏上地鐵開始，代表今次跟蹤任務正式展開。地鐵由灣仔經金鐘、旺角轉車，我都同 target 相距廿幾個人位，就快到彩虹站時，target準備落車。敝！第一個難題：佢落車轉左定轉右呢？快d望實電梯位置，佢轉左我轉左，佢轉右我就轉右，無論如何唔可以迎面相見。好彩，電梯響佢果便方向，我跟。

一到彩虹站，target 就好似好放心，一次都未望過轉頭，所以由佢出地鐵一路到小巴站我都跟得好易。但係，第二個難題出現：佢等緊去西貢嘅小巴，咁我點跟呢？上埋一架車實比佢見到，唔上又唔知佢響邊度落！唯有……

剛剛小巴站後面有架的士等客，即刻上的士，話比司機聽，我跟蹤緊人，target上緊前面架小巴，佢開你開、佢停你停，睇表加$10。的土司機頗年青，對今次跟蹤行動似乎都產生興趣，回應一句：no problem，即刻開車，徐徐跟住小巴。而我亦揸定錢，佢落車我就落車；

一路盤算如果佢半路落車，無遮無掩好易比佢見到，咁咪前功盡廢！好彩，一路到達西貢總站 target至落車。Target落咗車，好明顯一路行一路笑，完全無警覺性，可能佢掛住就快可以偷食啦！可惜佢諗都諗唔到，灣仔去到西貢偷食，已經比人吊住尾！

由小巴站到海邊左轉右轉，就見到有間酒樓。Target明顯黎慣黎熟，直接上二樓。上咗二樓，敝！第三個難題出現，我點上呢？上去容乜易比佢見到？唔係喇，打比哈女叫佢黎喇。

去茶餐廳借電話。『吓！響西貢？上咗酒樓飲茶？你有無上去見到佢同邊個一齊呀？咁遠？我點黎呀？』，哈女好難相信，我竟然跟到西貢！講真，target都以為咁遠唔會有人知。我隨即教哈女點黎，然後繼續企番響酒樓對面，擔住遮，睇到實。

7個字之後，哈女帶埋個女殺到，離遠望到我，我指佢快d上去，佢兩個三步夾埋兩步上咗去，無耐……敝！哈公突然一個人狂奔落樓，轉右，走呀！！！ Oh！ No！唔通“黃咗”？我想跟住哈公睇下佢走去邊都追唔切！

唔通就咁就收工？我響原地企多十幾分鐘，想等哈女落黎就走，點知哈女就等唔到，哈公竟然走返酒樓。又過多十幾分鐘，精彩喇！哈公、哈女、哈女個女同埋一個女仔（事後知道，個女仔仲細過哈公個女）一齊落樓，轉左，入咗茶餐廳講數。

點解呢？點解哈女響哈公走落黎之後唔落黎呢？點解咁峰迴路轉又比哈女捉到正呢？原來哈女一上酒樓就比哈公見到，哈公立即閃，哈女見佢唔到，不過見到把遮，把遮係佢買比哈公嘅，放遮個位無人，但係明顯有人坐緊響度嘅！因為有茶，同埋有粒燒賣響隻碗度未食。個位隔離有個女仔坐響度，哈女唔問個女仔，佢問搭枱食客：『請問e個位係咪有個男人坐緊架？』『係呀？』『咁個男人呢？』『係喎，頭先仲響度架！』，哈女醒呀！佢響茶樓等哈公返黎！

………

大功告成！以後每次去西貢我都想起e件『精彩絕倫的跟蹤任務』。