3叔公BLOG: 2月 2013

2013年2月28日星期四

『元宵花藝』

3叔姐趁新年前參加咗港燈家政中心嘅『元宵花藝』課程，一舉兩得。

一係學花藝、二係過年屋企唔使買花。

E件其中一件作品：

2013年2月26日星期二

Rose & Ring 拍攝曝光

1 月9日，屋企有好多玫瑰、有d介子、有個 notebook、有個電筒、有部相機……引起我好大興趣影d相：

搵支電筒照下

嘩！光得滯！

e個光源剛剛好

d花靚唔靚？

拍攝工具：Canon Powershot SX10IS + Nissin閃燈

入貨

趁天地圖書大減價，又入咗

d貨，加埋前一陣響大眾入嘅存貨，e家一共有6本，有排睇。不過因為最近又朝9晚9（其實8點半已經開工睇e-mail），都無乜時間睇，全靠坐地鐵或者瞓覺前睇一陣。

講番d書，兩本福建旅行書，其中『福建之旅』只係$10，買黎睇下福建嘅旅遊景點，好有可能Q3去行一轉。

兩本藍海寧，其中空姐第9集係最新嘅！

一本『地勤手記』由國泰職員寫，應該好真實。

最後一本『團友,出發』，無乜期望，因為太口話化。

2013年2月25日星期一

紅棗龍眼糕

3叔姐學整紅棗龍眼糕，制作過程頗複雜，用紅棗同龍眼肉分別加咗糖開好粉之後，先落一層紅棗(深色)蒸一陣，然後落一層龍眼(淺色)蒸一陣，再落一層紅棗蒸一陣，又落一層龍眼蒸一陣 ……結果蒸咗9層！

3叔姐兩位御用試味尚宮評語：雖然仲有進步空間，雖然甜得滯，但係第一次整已經算好味、算煙韌、算有紅棗味……80分，3叔姐加油！

2013年2月24日星期日

改衫改到頭昏腦脹嘅精神支柱

今晚搵針線想挑褲腳時見到3叔姐衣車上仍然放著一幅小相架。

當年3叔姐為幫補家計，會攞衫返屋企改，改長改短改闊改窄都得。唔明白點解咁多衫改，d靚女唔啱著都買，又或者專登買細碼衫，再搵3叔姐響兩邊加厘士駁番闊佢，變咗個欵都得。

有d靚女一有d肥或者有d瘦咗又改，所以3叔姐隨時朝9晚5坐響衣車前面。

小相架就係3叔姐當時改衫改到頭昏腦脹嘅精神支柱！

2013年2月23日星期六

環保堂細妹

一如以往，堂細妹又一家大細黎拜年，一輪恭喜之後開始派利是，點知佢攞咗一叠利是出黎比我，比我？阿妹比利是阿哥？原來果叠只不過係利是封，佢每年我地8封利是，得幾年已經儲咗幾十個，佢保留得好好，今年專登比番晒我再用，真係想唔到，亦好欣賞佢咁環保，比個“讚”佢。

d利是封真係唔講唔知用過，講比人知用過佢都唔信，信又唔介意收！

2013年2月19日星期二

因為 headcount 所限，部門最近有全日及半日 part time 空缺各一。

全日 part time 已於農曆新年前上任，到今日剛好7整日，所有有份派利是嘅同事都有派利是比佢，包括放多兩日年假到今日先至開工嘅某 team head都有比。點知下奏收到 HR 通知，佢已經 through agent 辭職，聽日生效。某 team head 知道，直情想即刻問佢攞番封利是。至於辭職理由係“太多野記，唔適合佢！”

到請半日part time，in佢果陣佢態度誠懇，仲要求18號（即係今日）過埋年至開工，返下奏，一個星期做17個鐘。結果我等到佢兩點半唔見人就打比HR，HR話 agent 話佢搵到份長工，所以唔會黎做part time 喇！

無計，怪只怪公司鍊到員工盡，唔準請長工，請part time 又出手低，唉！

2013年2月14日星期四

2013 情人節

今日情人節，公司一札花都無。係男士孤寒咗？定係女士清醒咗呢？

響街就見到有男士送咗花比女士之後一齊行，可惜札花咁重就由位女士一路揸住。點解男士唔有風度d揸番？定係女士一定要自己揸比人望下呢？

唔明白，花嘅身價點解會響2月14號突然暴升，15號嘅價值又打回原形，咪又係果札花？

睇新聞話今年租又貴花又貴，所以一束11支玫瑰要$900幾，唉！如果真係租又貴花又貴，你日日都賣$900幾啦！藉口！

好多結咗婚嘅男士都扮晒忙碌，又話開會又話加班，總之就唔返屋企食飯，靜雞雞同情人食！情人節嘛，梗係陪情人啦！

講真，我未試過情人節送花比3叔姐。有次試探下佢想唔想收，比佢話嘥錢，佢問我知唔知一札花可以買到幾多斤菜呀？結果我真係買咗斤菜比佢炒黎食。

今晚買咗個3叔姐飛佛嘅迷你芒果脆脆比佢歎下，唔通，又買斤菜咩！