結婚相(1) 14年

收錢影結婚相足足影咗14年，38歲退休，唔影喇！見好就收。好？梗條啦，因為14年來未逢失手。點先至算失手？是但有一筒菲林影咗曬唔出無貨交就叫失手囉！加上腰痛，唔退休唔得。好記得最後一單響荃灣影完相走人，$180的士返鰂魚涌，太攰喇，返到屋企，放低個袋，入面有兩部機、3支鏡、兩支機頂燈、10幾筒菲林、24粒叉電，廿幾磅重......一邊沖涼一邊吹住口哨，38歲盛年退休 (其實係影收錢結婚相退休啫，之後仲有影d無錢相架.......)

其實每次答應咗一單job之後開始，直至影相當日，總係要小小心心，唔可以有差錯，例如屈到腳之類，唔可以病，唔可以有意外，例如壞相機.....

影相當日更加步步為營，唔好差錯腳，唔好講錯野，唔好唔check相機就影，唔好叉唔夠電等等等等。往日唔同今時，往日影咗相無得即刻睇架。有時影完燒豬回門又未夠時間去酒樓，可以有個零鐘break，唔好四圍去呀，去酒樓附近d美心或者大家樂飲杯咖啡，好好休息....

待續.....