結婚相(7) 玩新娘

唔知點解e家唔興玩新娘，e家興天才表演，例如新郎新娘唱歌、跳舞、玩樂器....

以前差唔多每次都玩，e家睇番，好過時喇：

• 傳冰，一粒冰由新郎傳比新娘，又由新娘傳番比新郎，用口；
• 傳雞蛋，比隻生雞蛋新娘要佢由新郎右邊褲腳上，經過褲浪，由左邊褲腳落，看的人都想新娘弄爆隻蛋，咁佢老公就一褲都係；
• 將十幾隻釦針釦在新娘身上唔同位置，蒙住新郎對眼，要佢用手摸哂出尼；
• 借件酒樓(或酒店)制服比新郎著住，藏於賓客中，要新娘用眼搵出尼；
• 蒙住新娘眼，叫幾個兄弟陪新郎排排坐比新娘摸"下扒"睇下估唔估到邊個係老公；
• 搵隻大碟加三隻碗仔分別蓋住雞頭、雞胸、雞尾，等新郎揭到邊度就要錫新娘邊度；
• 射龍門，叫新娘坐低張開腳，比個橙新郎哥要佢射入兩隻腳中間；
• 敲碟，縛隻匙更響新郎腰間近拉鍊，縛隻碟響新娘肚腩落d，要新郎用腰力令到隻匙更敲落隻碟度有聲為止(個動作都幾3級)

唔講喇，實在太out喇。

最後講多個，記得有次個新郎哥奀奀瘦瘦，玩遊戲輸左，要罰抱起老婆繞場一周，但佢老婆頗健碩，抱極抱唔起，出哂飲奶力，但抱起數次都放棄。終於佢老婆忍唔住，抱起新郎哥行個大圈至返尼。