結婚相(8) Professional 的要求

影相叻唔代表影結婚相叻，影相靚亦唔代表影結婚相靚，如果唔識影結婚相，講真，唔好接，因為影得唔好，無得救。初初接影結婚相時好驚，怕影衰，至到最後，經驗豐富了，都仲會驚，始終，影衰咗，會好對人唔住。

有d心得好想寫低：

• 衣著不能太隨便，短袖T裇一定唔著得
• 影哂成個過程，有影多無影漏
• 永遠行新郎新娘前面或者對面
• 註冊處內的程序千篇一律，所以唔可以唔記得點走位：親友先入場，新人先至入，幫手擺好介子同花束，註冊官出現，讀宣言，戴介子，揭頭紗，咀一啖，新郎新娘簽名，証婚人簽名，打印落結婚証書，恭喜乜生乜太，拍手掌，禮成，影相
• 婚紗外影就係唯一發揮攝影技巧的時候，我影得最多係香港公園、中大、大會堂、淺水灣 ......如果我知有外影，通常會準備風扇仔，坐地膠枱布，一塊布(酒樓果塊)，softer....等必須品。所以個相機袋好重
• 禮堂相四四正正，四平八穩，唔使影花巧野，盡量用乜乜聯婚做背景，等人睇相時一睇就記得響邊度影，e家有mc幫手安排影相程序，以前，主人家一定要趁早影先，否則d客尼要招呼人就好難集合
• 斟茶相要少少前後坐或者企，就唔會遮住
• 要執位，唔好隨便企埋位就影；特別係大堆頭相更加唔可以客氣，邊個坐邊個企，左右要平衡，影時要比signal，叫人笑，影多幾張
• 逐圍敬完酒緊記返埋位新郎新娘都要影互相敬酒相，同父母影，同襯家影
• 同video要夾，同一方向影，霸靚位影唔好禮讓，video唔會同你爭
• 把口要好，講好意頭同吉利說話

唔寫喇，太多喇，出本書都可能寫唔哂。