造恤衫

今日同舊老闆食完Lunch，知佢造咗3件恤衫有得攞，於是跟佢去攞。

我d恤衫著得好粗，一星期5日都要著，日日換，所以好容易污漕或者穿窿。平時都係買恤衫，貪平，$100有交易，不過多數都唔啱身，一係就打唔到呔，一係就闊，一係就袖長，次次都要勞煩3叔姐幫手改。

唔想麻煩3叔姐咁多啦，所以想造恤衫好耐，今次見到舊老闆造d衫手工唔錯，就造一件試下，$250，另加衫袖綉名$10，10日後有得攞。好嘅話再加碼。

度身結果好攪笑，原來我3圍係40、39、40，同事笑我：你都仲有1吋腰！其實e個係造恤衫嘅尺寸啫！

北海道雪場蟹 / 毛蟹

小牛受Mon姐所托，響北海道買回雪場蟹(大)同毛蟹(小)各一隻。咁大個人都未食過，所以6點半就放工走人，快d返屋企拆蟹。

叫埋『朱古力』黎食飯，除咗蟹之外，3叔姐仲煮咗Mon姐由澳洲帶回嘅急凍包、蝦仁叉燒炒蛋、細鱗一條、釀冬菇and咖哩雞










飯後果係：


小牛仲好乖送咗手信比我地，多謝小牛！

小牛：唔使客氣！

好鍾意李英愛做嘅長今 - 100分

3叔姐e期睇番日頭重播嘅大長今，睇得滋五六味，可惜又要夾正時間睇，又唔係從頭開始睇，有d到喉唔到肺，我唯有摷出私人珍藏DVD，決定由今晚開始，由頭播番比佢睇。

仲幫佢將大長今首『蒼龍』入咗佢部手機做來電音樂。

亦都唔怕核突比人知道，我男人老狗，睇大長今都睇一次咸一次，當然唔係咸出聲，但係兩行眼淚就係咁流。

套劇真係好正，我選佢為我睇過最好睇嘅劇集！我已經睇咗5次！

私人珍藏：廣東話、國語、韓話DVD一套；原聲Sount Track CD一隻

私人珍藏：原聲Sound Track CD一隻

懷舊美食 - 麥芽糖夾餅乾

今日同事帶咗囡囡返公司，剛好有麥芽糖同芝麻梳打餅響度，問佢食唔食，佢點點頭，即刻開檔，夾件比佢食。問佢好唔好食，佢又點點頭。反應雖然有啲cool，但睇得出，佢對e個第一次食嘅『麥芽糖夾餅乾』留有好感。

因為3叔姐對e個懷舊美食都好鍾情，所以屋企都有d貨看門口，不過就唔食太多喇，因為100gm麥芽糖就有60gm suger。

Eileen 結婚 - 3 Sep 2012

堂大佬響多倫多嫁女，一眾親堂表兄弟姊妹聚首一堂，目的係每人錄一段片講一d野，恭喜一下堂大佬大嫂，同新郎 (Marco) 新娘 (Eileen)。然後由兩個代表親自帶過加拿大。

新娘Eileen同Mon姐好有緣，Eileen媽結婚3叔姐做姊妹，Eileen媽同3叔姐差唔多同期有咗，預產期係Eileen媽早一日，兩個都book梁振文醫生響聖保綠生，結果，Mon姐早Eileen 30個鐘跑出，做咗堂家姐。

當年兩舊飯，e家，Eileen就結婚喇，佢仲係張家第一個醫生呀！

7位分開坐，坐唔坐?

今日同6個同事去大叻越南餐廳食lunch， 無位，要等，門口攞張7人飛，原來已經係第2張7人飛，有7個人已經等緊。

帶位員問我地兩批人：7個位一齊暫時無，如果分開坐坐唔坐? 我地問：點分呀？帶位員話：唔知架，有位就叫你！

我見既然一齊食飯梗係一齊坐啦! 所以婉拒咗帶位員嘅好意。不過另一批7個人就話：無問題。

5分鐘後，帶位員對果7個人話：樓上有兩個位，上兩個先啦！上咗兩個！果7個人仲有5個企響度！

5分鐘後，帶位員對果5個人話：樓下果邊有3個位，再入3個啦！入咗3個！果7個人仲有兩個企響度！

我地其中一個同事對帶位員講：我地等咗好耐，幾時有位呀？

帶位員話：(指下其他人)人地都等左好耐啦！

0分鐘內，我地走晒！