3叔公BLOG: 11月 2012

2012年11月30日星期五

一舖過嘅DSE

同事“暈低”個仔今年中六，自然既擔心又緊張黎緊嘅DSE，因為一鋪過，得就得，唔得就.......無奈要搵其他出路，或者玩多一年。

3叔公係一個幸運嘅過來人，當年Mon姐面對重重關卡，扶扶碌碌過完一關又一關，叫做順利完成學業，細心想下，學業上我幫過佢d乜野呢？物質上我又幫過佢d乜野呢？.....大致唔記得喇！我淨係記得幫佢默書默默下瞓著咗，直至到佢叫我：爸爸、爸爸得喇！寫完喇！佢係咁推我隻手推醒我。其實由小學3年級下學期已經由佢自己讀自己溫，我同3叔姐都幫唔到手。

所以寄語“暈低”，要緊張but唔使擔心，佢條路佢自己會行喇！生活上經濟上心靈上你比咗出黎就得架喇！

2012年11月28日星期三

事業線

無奇不有！今朝返工剛踏入公司門口響我前面4至5呎距離一條“事業線”展現眼前。

條“事業線”足有3吋長，不過佢唔係響前面，而係響後面。OMG！果位女同事每行一步條低腰褲就跌一下，佢件上衣又唔夠長.......居然，居然著成咁返工！

2012年11月27日星期二

少年PI的奇幻漂流 - 50分

少年PI的奇幻漂流，無疑算係一套好片，無論創意、意圖、3D、特技、制作等都無得投訴。

不過，對一個返完一日工，佢個海難前嘅舖排真係太長，無心機睇，忍唔住瞓咗一陣；

最精彩嘅海上漂流，雖然知道佢響水池拍，都覺得拍得好迫真，大海茫茫，飛魚、巨浪、浮島、人虎相處，3D做得好突出，但係我係睇科幻片大嘅，除非我未睇過阿凡達，否則會比高d分。

套戲兩個鐘，頗長，都係果句，唔係唔好睇，只不過唔係我杯茶。

2012年11月26日星期一

好書推介 --- 糖尿病飲食宜忌速查

因為血糖偏高( 正常4-6度)，所以對飲食不得不認真小心處理，唔敢樣樣都放入口。

除咗醫生勸告，例如魚、菜、雞胸肉可以食；例如少飯；又例如唔準飲汽水果汁等等等等，都想買本書放響身邊，可以隨時check下。

發現咗本正書，e家各大書店都應該有得賣：

仲有一個網址介紹e本書：
http://www.sanmin.com.tw/tryread2.asp?isbn=962144858&rp=962144858_p1.jpg

2012年11月12日星期一

我賽跑冠軍黎架！

當我學電視有個宣傳片話：“我賽跑冠軍黎架！”，3叔姐同Mon姐就異口同聲話：三十年前吖嘛！所以，唔記得幾時，應該由做天梯開始，的起心肝，早d放工，8點半前返到屋企食晚飯，9點食飽（其實知道飯後做運動都唔會食咁飽），9點半落公園做番運動，做一個鐘！10點半返上黎。

可以的起心肝都係因為有3叔姐陪，而且有佢教我做完運動後拉筋。佢話如果唔時時拉番鬆d筋，d筋就會越尼越縮，年紀大咗就會手腳伸唔直，個人越縮越細粒

其實都唔係做乜野劇烈運動，只係散步或者急步行，唔敢跑，驚膝頭頂唔順。急步行已經可以出汗，行45分鐘就開始拉筋。順序係拉小腿、前大肶、後大肶、肩膊。3叔姐好犀利，隻腳打橫放上橫槓度仲可以貼個身去點膝頭哥。想當年佢膝頭哥痛，d醫生又話筋膜炎又話軟骨退化，攪到佢上樓梯就痛，e家？上樓梯要等埋我！

拉15分鐘筋，講都唔信，一路行番屋企感覺個人高咗輕咗！

其實日日早出晚歸，e家每日有一個鐘兩個人一路行一路傾計，都傾到好多野，例如退休計劃、社會近況、親朋戚友，真係無所不談，又好似個人習慣，自從3叔姐提出之後，我每日出街同埋返黎都會放番拖鞋/出街鞋入鞋櫃；仲有每日洗完碗除咗抹埋爐灶牆身之外，仲掃埋拖埋廚房個地至叫做OK，原來3叔姐話煮飯時會有好多汁醬飛咗落地!!!

繼續努力！

我地就係好似響網上搵到兩幅圖咁拉筋喇！

2012年11月10日星期六

一日豐盛嘅假期

第一站：潮庭

潮庭一路都保持水準，特別係糯米卷，無人能及。今日食埋平時好少叫嘅蝦餃，佢做得仲好過廣東式酒樓。

第二站：日出康城

因為起好咁耐未去過，想睇下。結果，d樓好靚、環境就......4維都仲起緊樓囉、味就嗅唔到有乜唔妥，不過由地鐵站行到去領都入口就熱到出晒汗，又曬又遠，似乎仲遠過愉景新城。

首都

領都

第三站：北角新斗記

一般啦，重點食物例如乳豬同燒鵝都唔出色，反而服務唔錯。

豆漿機

3叔姐上網淘咗個豆漿機，美的牌，全自動，落咗豆同水、少少糖，15分鐘就飲得。

祝3叔姐活得開心、身體健康

今年3叔姐生日嘅歲數好得意，係剛剛Mon姐嘅一倍，即係假如如果Mon姐18歲，3叔姐就係36歲。e d 機會響兩母女之間只會出現一次。

今年斗膽，去花墟買咗札花送比3叔姐，祝佢活得開心、身體健康。

2012年11月9日星期五

寒戰 - 強差人意，65分

睇寒戰完全係比郭富城個post吸引。

果然，好型！雖然做到副警務處長咁高級，佢都掌握得恰到好處，相反，梁家輝又係副警務處長，但係成個賊咁。

頭3分1戲講兩位副警務處長爭話事權，我一面睇一面加分，唔係講笑，我差唔多比到90分。但係之後由比贖金開始就一路扣分，個匪一路叫郭富城帶住d贖金e度去果度去，不停轉地點，好似一個人響高空望隻蟻咁，仲連郭富城甩咗鞋帶都話佢知。當觀眾3歲，之後煙花爆到連樓都爛埋，飛晒d野落街，鏡頭3秒就過咗，唉！所以扣到佢得65分，強差人意。

2012年11月7日星期三

飲早茶

最近一個月轉咗食早餐嘅習慣，由“咖啡+3文治”換成“1盅兩件”。因為公司附近開咗一間金御海鮮酒家，11點前茶錢$6，點心半價，另加12% service charge，所以食籠雞包仔$9，或者食盅飯$9.80，都只係十七八蚊。人少清靜，好適宜睇報紙。今日仲好誇張，茶錢$1，直至另行通知，都唔知佢點維皮！

而每日飲茶見到果幾班人或者果幾個人，都已經變成熟客。不過熟客還熟客，唔好似熟賣熟。話說經理May姐，見到有位女士帶個未夠一歲嘅孫女黎飲茶，May姐初初望下個BB，過幾日撩下佢，過幾日摸下佢，又過幾日抱下佢，人地爺爺嫲嫲見熟咗都無乜野，亦自豪個孫得人鍾意。不過終於出事，May姐有一日咀咗個BB 3啖..........OMG!

講開飲茶都要講一講筲箕灣嘉豪酒樓。話說上星期6同3叔姐去筲箕灣天悅廣場中旅社入紙換回鄉卡，入完紙貪近就響嘉豪飲茶，叫咗米粉、鯪魚球同埋鴛鴦燒賣，自問同3叔姐唔係要求高，唔係隨便浪費食物嘅人，結果每樣食咗少少就埋單走人，好難食！米粉油淋淋，鯪魚球比較好，每人勉強食1粒，鴛鴦燒賣，唉！都唔知乜野黎。行到街口，見到有間茶餐廳，同3叔姐你眼望我眼，心領神會，入去，坐低，3叔姐叫個A餐飲熱檬水，我叫個C餐飲熱齋啡，20分鐘之後，懷住滿足嘅心情埋單！