元宵佳節的承諾

3叔公 : 我點都同你去一次北海道 .

3叔姐 : 要等我未行得之前去呀!

3叔公 : 好!

武道狂之詩......

一口氣睇完侄仔借的"武道狂之詩"卷一至卷四, 可以暫時放低武當派同d刀刀劍劍, 因為唔知卷五幾時出, 趁此空檔, 即刻去商務補充心靈所需, 買下梁芷珊的

($48)

同張永霖的

($80). 八五折

休息站：兵頭花園

我開gang嘅地盤響半山，包括纜車線東面嘅堅尼地道、麥當奴道、寶雲道、波老道及纜車線西面嘅堅道、羅便臣道、干德道、西摩道等，及所有有關打直嘅街道，例如德己笠街、嘉咸街等。

當年未有上山電梯，通常一早要坐23號A或者12號上山，再由高做落低，一對摩打腳，日日百萬行都唔止。

當兩邊山都無科佬，我就會走去兩邊山中間嘅兵頭花園坐，等科佬同埋休息。

當年無手機，離開用戶家就無電話打，除非有公眾電話。兵頭花園當然有電話亭啦！電話佬見到公眾電話就有計，可以打109叫同事駁線，因為control就響109後面，通常都肯駁，最多問你幾號“冧把”。如果唔想麻煩109，就拍叉，就係利用公眾電話掛聽筒個勾，控制到剛剛收線與唔收線之間，2字就拍兩下，9字就拍9下，好易打通，通常20分鐘就打一次，有野做就走，無野做就睇武俠小說，我記得天龍八部都比我響兵頭花園睇咗兩次。

兵頭花園好正，空氣好，有花睇，有動物睇，又可以睇人影相。

好懷念！

響匯豐銀行舊總行見到好多現金

如果半山真係無電話壞, 就要落山，落山後通常做愛丁堡廣場一帶d大廈，包括舊匯豐總行。

舊匯豐總行，一座極grand嘅建築物，大堂宏偉，感覺涼浸浸嘅，中間一條通道上二樓，兩邊係櫃台...........唔記得詳細環境喇，不過仲有兩個深刻印象 :

1) 大堂放線只可以放明線，因為雲石地板，麻石樓梯，無預設喉通，有都爆晒，唯有放明線，放明線只准黐唔淮釘。

2) 有一次有機會入保險庫，手續都麻煩，但不及域多利監房，過兩度鐵門，入到去，嘩！錢呀！兩張乒乓波台咁長嘅一張台上，全部係錢，山咁高，一班人坐兩邊數錢，原來一叠叠銀紙由機器數過，要再經人手數多次，先至用紙綑好。

依世人都未見過咁多現金。

舊匯豐總行響1978年尾拆咗喇。( 我都有幸見證到新舊匯豐總行嘅存在！)

家賊難防

最近聽港台的玩玩星期天, 貴花田問一班小朋友如何用利是錢.

一位小朋友說 : "我會交比阿媽儲起佢, 不過有次打簿, 得番$40, 阿媽話借咗尼用住先喎!"

旁邊另一位小朋友話 : "唉! 家賊難防."

激死!

夜探山頂盧吉道30號

有一晚當夜，已經8點半，滿以為實無驚無險，又到9點，點知 control 收到一位外籍女士電話，因為個仔入咗醫院，擔心醫院隨時有電話打黎，如果電話有壞就弊啦，所以要搵人檢查一下個電話機同條電話線，make sure無問題，所以，唔去唔得。

急忙飛的上山頂，去到盧吉道口，司機見到個禁區牌，弊！唔入得！高級住宅，的士想入要先去山頂警署攞禁區紙，唯有落車行入去啦！

點解咁大霧呢? 霧大到得10幾呎視野，有無鬼呢? 有無狗呢? 有無蛇呢? 撞唔撞到人呢? 30號究竟嚮邊呢? 點解行極都未到？街燈好遠至有一支，就算有都好昏暗。左手攞電筒，右手揸支長鏍絲批，胡思亂想，沿途數住號碼，去到一個分叉口，左定右呢? 好辛苦先至見到兩個路牌，一個夏力道，一個盧吉道，（請睇下圖）

(e張相可以見到左邊夏力道右邊盧吉道，幅相年初三 (16 Feb 2010) 影，當時人山人海，但請想像，平時嘅夜晚9點經過e度，舉目無親，濃霧圍繞嘅境況) 

終於9點2入到屋，間屋好大，得一位外籍女士響屋企，其實佢應該仲驚過我！ 我小心check哂所有要check嘅，要走喇，外籍女士猛say thank you。

好記得入去時乜都遇唔到，用咗20分鐘，但走番出大路只用咗10分鐘，更奇嘅係，走出去時遇到 1) 兩男一女散步，2) 一位男士放狗，3) 路邊木椅有兩個人坐著傾偈。

我已經話之你，走得快好世界。 出到小巴站坐小巴落山，走去德己笠街食碗雲吞麵，舒服晒！晚上10點! 覺得好叻，幫到人。


e家每次經過盧吉道30號都停步望下。(睇下30號個門牌幾難睇到！)

年初一, 情人節

今日年初一, 祝3叔姐 and Monica 幸福快樂, 心想事成.

今日情人節, 送比3叔姐 :

年初一 - 小小鋼琴家到訪(2)

為了招待小牛, 3叔姐出盡法寶.

安記魚翅




生炒糯米軟飯


炒花花


心形蘿蔔糕 (未煎時個樣)


炆冬菇


單骨南乳雞翼


唔好引我啦!



洗碗梗係3叔公負責啦.

年初一 - 小小鋼琴家到訪(1)

牛媽在旁鼓勵

Sent From Su Fen

我正要坐下如廁時，聽到隔壁間的人突然開口說 "嘿，你好嗎?"

我不是那種習慣跟人家在廁所打交道的人。我不知道自己遇上什麼情況，我尷尬地回答"還好啊!"

然後隔壁間的人又接著問： "你在做什麼呢?"

這是什麼問題啊? 當下我真的覺得太詭異了。於是我回答"嗯 ...跟你一樣坐在馬桶上啊"

此時我只想要趕快離開廁所，接著隔壁間的人又問："我可以過來嗎?"

這個真的太荒誕了，於是我打算禮貌地結束這個對話，我說"不行耶....我現在沒空!!!"

於是我聽到隔壁間的人緊張地說: "聽著, 我等一下再打電話給你，因為隔壁間有個笨蛋一直回答我所有的問題 !!"

出入域多利監房

有一日接到域多利監房修理電話嘅order。

域多利監房響大館上面，都係我負責範圍之內，所以間中都要入去。

通常去到更房門口報到，然後問清楚邊個分機壞，及壞機位置，位置好緊要，如果響監房出面，可以掛著証件自出自入，但如果響監房內就麻煩，點麻煩？要人帶，無關修理嘅通通要放低響更房，包括隨身用品，銀包，原子筆，甚至要除皮帶，除鞋帶，只淮帶登記咗嘅工具。入到去，唔好望犯人，拿拿聲整，整完即走，如果出番去對過d物品唔齊仲煩，不過我未試過。

都試過靜雞雞望下單人倉，入面真係得一張石屎床，床後有幅矮牆仔，之後有個蹲廁，有個洗手盆，就係咁，除了辦大事蹲低比人睇唔到之外，做乜都比人睇哂。

仲敢收茶錢?

我開gang做“科佬”時ICAC已經成立咗 (1974年成立)，但每次上門修理完電話，d客仲習慣比茶錢，我必定禮貌地婉拒，但有時都婉拒失敗。

• 有一次幫一位老人家整完電話要走，老人家隻手已經揸住d錢，話比我飲茶，我當然say no啦！同老人家講，唔使比錢架，修理係免費架，點知佢一手掟晒d錢入我“架生袋”，即刻砰聲柵埋門。我返到屋企，"摷"哂d錢出尼，一毫，兩毫，五毫都有，夾埋個半銀錢。

• 有個星期六朝早響一個馬主屋企修理電話，見佢個“攪盤”幾舊，於是換咗個新攪盤比佢，馬主高興，叫阿四比$50我，突然又問我：師傅你賭唔賭馬架？賭就比隻貼士你，當時死蠢嘅我話：我唔識賭架！佢隨即叫阿四換過張$100，嘩！我當時人工每個月得$885.-咋 ( e家講番出尼唔知會唔會比ICAC拉呢？)

• 又有次唔記得年初幾，港督府有電話壞，（當時港督係麥理浩）。 去到，原來司機宿舍壞電話，整完，走人，個司機突然比封利是我，吓！港督府都比茶錢，佢話，新年流流，收啦！咁多謝晒喎！係青蟹一張。

* 開gang即係話我大個仔，可以獨自一個人做科佬

** 科佬 = fault

關帝保佑邊個多d?

做電話佬好多年, 但做上門修理電話就得兩年經歷, 不過, 兩年都可以遇過好多難忘事.

有一日，先後接到兩張order.

第一張 : 荷李活道大館，雜差房有電話壞。入到雜差房，一邊整電話，一邊四圍望，最吸引我嘅係一個關帝神位，神位足有2呎闊3呎高，設備齊全，原來差人做野要關帝撐嘅.

第二張 : 士丹頓街某財務公司有電話壞。入到去，又係一邊整電話一邊四圍望，成個office得4張寫字台，我發現每張台底都有支壘球棒，但係最吸引我嘅，係一個關帝神位，神位足有4呎闊6呎高，座地，大過大館雜差房果個3倍，簡直大到唔信，成個關帝像，人咁高!

究竟，關帝會唔會根據邊個神位大就保佑邊個多d呢？

Presentation

今日同老闆一齊做了個 presentation, 雖然聽眾都是同事, 但卻包括了一位 Managing Director, 一位 Director of IT, 一眾IT精英及一位 Senior Vice President (老闆的老闆), 內容雖是講述日常工作上, 系統上遇到的操作問題, 但都怕被抽, 始終好少遇到咁多高層在場聽自己講野, 一旦被抽答不上, 如何下台? 還好各高層識做, 態度和藹, 談笑風生, 兩個半鐘, 轉眼就過.

多年前都試過到澳門新世紀酒店sell合約, 當時職位只是一個 Service Officer, 但對方五個人, 包括General Manager, Financial Controller, Telephone Manager, Room Division Manager 同 Front Office Manager. 事後先至識驚.

見工與升級試

考完會考，做咗兩份暑期工，就入紙考電話公司同埋救護隊目(即係一架十字車內嘅兩柴)。救護隊目考先，要過3關，第一關體能，考10項全能，包括單槓、雙槓、sit up、背人、掌上壓、來回跑、爬繩、鴨仔跳、上落樓梯....第十樣唔記得，每項10分，我有84分，全場第3高分，但第二關考英文筆試，肥咗，所以第三關面試都唔使考就bye-bye.

電話公司見工都好唔簡單，要過5關，包括：筆試、人事部面試、見工程師、驗身及照肺。驗身好核突，個醫生居然連有無痔瘡都要check，想唔到見工遮，連身都失埋。全部通過之後要我揀：地線、安裝或者修理，終於揀咗修理，一做就做到e家，32年來，轉過幾個post但係都同修理有關。

所以咁多年黎自問工作經驗豐富，但係見工經驗就甚少。

入職後做 TT (Trainee Technician)跟人及入學堂，9個月後開 gang，one man gang，專做半山住宅電話，3個月後帶人....15年內升咗5級....第一次考升級試係 Technician 升 TO2 (二級技術主任)，面對4個人，包括人事部，chairman 及兩個工程師，全英文對答，人事部問我咁 young，如何能勝任、工程師問一條線由 DP (Distuibution Point) 至客最長可以放幾長、另一條問有客投訴你有個伙記無禮貌同講粗口，點處理？Chairman問如果升到級做野同未升級有乜唔同。唉！廣東話都好難答啦，仲要明珠台，點知又比我升咗。

請 part time

上星期 in 了一個 part time, 女士, 小朋友返學, 無做野幾年. 除了看看她跟社會脫節未, 及告訴她大概要做甚麼外, 我還恨心的說出要求 1) 隨時做超時 2) 無私人電話 3) 不準上網. 人事部同事驚我嚇親人, 即幫口, 其實依d係好基本員工守則, 做落唔係話咁嚴嘅, 唔通個仔有事, 學校打尼都唔比聽咩! 但係我都覺得講咗在先好d.

請同事我都係鍾意請成熟d, 如果真係全權由我請, 我會 1) 請大學生, 但不是太好成績 2) 已婚 3) 男性 4) 有兩個讀緊書小朋友 5) 供緊樓 6) 太太無做野, 加上比佢人工唔太低, 佢肯定唔走.

"我今晚煮個雲吞雞煲翅比你食, 吓!"

二月一號開始埋數埋到今日都未埋好, 其他工作又堆積如山, 真無奈, 打個電話比3叔姐呻兩句, 點知換來溫柔的豉勵, 同埋 : "我今晚煮個雲吞雞煲翅比你食, 吓!"

做得點辛苦都好, 屋企是最溫暖的.

好一個教訓!

今晚放工坐地鐵, 去到金鐘站, 有位人兄一上車就站近門口, 背靠玻璃, 二話不說, 拿出手機想打, 突然大叫"哎喲", 手機"咚"一聲掉地上, 再碌入條隙, 墮入車底, 一下清脆的"拍"一聲, 每個在場人士都可以肯定, 部機已經散哂.

e個教訓係……自己諗啦！

聽日先啦!

今日老闆Mic轉述了一位牧師所講的故事.

有三個魔鬼在商量如何害人：

魔鬼A說: 告訴人, 根本就沒有天堂, 等人再沒有上天堂的意慾, 就會甚麼壞事都做, 因為做好事都無用, 反正上不到天堂.

魔鬼B說: 不如騙人, 根本就無地獄, 讓人以為做了壞事都不怕進地獄, 然後不知不覺, 壞事做盡, 死後, 自然就要落地獄.

魔鬼A說: 阿C, 你有何高見?

魔鬼C覺得魔鬼A及魔鬼B的方法都不是很好, 但即時又未想到辦法, 想用多一天時間去想,便隨口說: 聽日先啦!

魔鬼A及魔鬼B聽後, 大讚魔鬼C的方法好, 無得頂.

從此，人就受到魔鬼的引誘, 溫習, 聽日先啦! 做工, 聽日先啦! 滅肥, 聽日先啦! 做運動, 聽日先啦!......做甚麼都聽日先啦! 一日推一日