“.....唔該埋單！”

今日 lunch 15人去小杬公飲茶，一張大枱響角落頭，我坐出面昭君位，一有點心黎就幫手放好，茶壺無茶就攞出黎等加水。

15人3壺茶，轉過頭又要加水，等極無人理你，我見就近有茶煲就出去攞茶煲入黎自己加，加完第一次，第二次.....第三次我竟然聽見有人叫我：“部長唔該埋單！”

其他同事即刻

3叔姐開工蒸蘿蔔糕

“3叔姐，今年要買幾多斤蘿蔔整糕呀？”

“往年就買40幾斤，今年買住33斤先啦！”

“咁多？我幫手拉架車仔去買啦！”

“買咁多人地有送貨架！仲送埋葱同一對大吉。”



幾年前已經開始用e個機去刨蘿蔔，幾pro架！不過唔係全部都刨，留番d切粒，有咬口。


我返咗一陣公司佢已經開咗工。


製成品：


3叔姐整嘅蘿蔔糕，無論食煎定食蒸，都係我有生以來食過最好食嘅蘿蔔糕！唔知有食過嘅人同唔同意呢？

收番佢個大紫荊勳章

近日熱門話題都關於當日接受香港政府頒大紫荊勳章、開賭檔、四個老婆、十七個仔女、口出狂言的人的事。

終於有野睇喇，人未死已經爭產……不過，細心睇吓，e個人幾聰明，自願又好，被迫又好，分晒d錢，一個仙都無，等你政府一個仙遺產稅都收唔到，所以，我提意政府收番佢個大紫荊勳章。

好快又過年

好快又過年。

細個好鍾意過年，燒炮仗，買白豆槍，買野食，利是，所有利是錢都係自己袋，唔使上繳。

結婚後好鍾意過年，可以派利是，好有滿足感。

開始無雙糧（張永霖做CEO時cut晒），淨得12個月齋糧之後，好怕過年，因為年關越黎越難過，要送禮，又食團年飯又食開年飯，要派利是……老電傳統，結咗婚要派比未結婚，上一級要派比下級，好似我d基層管理員，以前坐機樓平均每年派130封（只計算公司範圍內），每封$20都$2,600；e家搬離機樓，平均80封，都$1,600，cheap cheap地去轉泰國玩3日都可以。

好彩家有賢內助，年頭開個零存整付，年尾不至於咁無預算。

條腰最痛

初初做枱，小心奕奕，如何揸“分更”、如何用筷子夾斷麵，一早操熟；但分翅都要小心，如何將翅平均分比12碗，秘訣就係一開始幾碗唔好分咁滿，寧願之後加番，好過之前幾碗“畢”太滿到後面幾碗唔夠要由前幾碗“畢”番轉頭就肉酸。分翅最重要係分晒，一滴都唔好剩，因為“貴”。

分魚都好有技巧，一刀中間切落去，將魚肉向兩邊放，抝斷魚頭魚尾另放吉碟，跟住起魚骨，淋豉油，就開始分魚，千祈唔好急，攪到魚肉爛晒，不過動作要快，要襯熱，因為12個口已經張開等緊食。

唔覺唔覺彎住腰分8個餸加埋單尾飯麵，條腰好似斷開咁。

- 完 -

撞到朋友

幫餐最尷尬係乜，係撞到朋友。

我覺得尷尬係因為佢地好奇怪會撞到我，跟住又問d唔知點答既問題：

“咦！我無認錯人吖馬，你唔係邊個邊個？”

“咦！點解你會響到嘅？你無做老電咩？”

“咦！你好唔掂咩？做咁多份？”

唔通我會話你知我要搵多d錢等3叔姐可以舒服d搵私家醫生入私家醫院生女咩！如果我咁答佢地又會話：使唔使呀！.....所以我通常話佢知：間中賺吓外快姐！有機會再講吖！

餐飲服務業都唔少學問架。作為職業又如何？

待續......

蒸魚

平時屋企蒸魚相信好多人都識，去飲，咁多圍，咁多條魚，條條咁大條（通常2斤幾3斤重），要同一時間蒸熟點蒸呢？

原來係用蒸籠（有酒樓會用蒸櫃），例如30圍30條魚，用3個爐，每個爐上面有10個大蒸籠，每個蒸籠大到足夠放一條魚響裡面，咁就可以同時蒸熟咁多條魚。蒸熟上碟（隻碟無一齊蒸），就淋豉油落葱上蓋出場。

除咗龍蝦，其實一條魚最好食既部份都有機會響廚房，就係魚腩位，因為要劏魚，魚腩位都被切開，扣起果附近一d魚腩肉邊個知呢？酒店各部門大佬就知啦！收工識入廚房食喇！

待續......

打貓

去飲必定有雞，如果係炸子雞，雞身同雞頭會分開炸，因為一大鑊油同時炸個頭會炸到黑晒個身都未炸好。然後斬雞排好，每個傳菜捧住碟雞，去到廚房門口，個“打荷”先至每碟放番一個雞頭落碟。所以，去飲隻雞個雞頭多數都唔係同一隻雞既！

打荷=廚房內乜都要做既人，例如負責將粘板切好配好的原料腌好調味、上粉上漿、用爐烹制、協助廚師制作造型。簡单的說就是廚房裡面的全能選手也是一個雜工，什么都需要做，但什么都不是一把手。

咁“打貓”係乜呢？即係偷食，每次去飲，食到尾都無乜人食（e家d人都開始注意“廚餘”問題），當傳菜捧回食剩的食物返廚房，見到舊餸好乾淨，無人點過，就忍唔住偷舊食。我都試過幾隻蟹鉗無人食，咪食隻囉，肚餓呀！不過千祈唔好比人睇見！

待續......

西餐傳菜

上文提起大廚會留d好野比酒店各部門大佬收工入廚房食，令我想起一個笑話：

甲乙兩人去食飯，叫咗幾斤重上湯焗龍蝦，稍後龍蝦被切開一件件送上枱，

甲問乙：一隻龍蝦最好食果舊響邊度呢？

乙指住龍蝦肚最大舊肉話：e度！

甲話：唔係，一隻龍蝦最好食果舊響廚房！

雖然係笑話，但係未必唔會架，如果擺酒有龍蝦食，大廚扣起d留比大佬食邊個知呢！

講番西餐傳菜，同中餐好唔同。西餐響廚房已經分好晒，一圍10碟（擺酒食西餐每圍只坐10個人），不過出菜好得意，因為個盤唔可以一次過放晒10碟，要分兩次，第一次出6碟，第二次4碟，我到e家都唔知點解唔可以5碟5碟。

每次做西餐都撞正有特別安排，最常見就係食素，或者有印度人要食咖哩，都要先傳比佢地，再傳其他。

傳西餐要識托個盤，指公、食指同中指用力平衡成個盤，好似放響膊頭咁至可以出去，最難托湯，6碗湯好重，又驚托“瀉”。不過傳西餐比中餐傳少好多轉，因為西餐得湯、沙律、頭盤、主菜、cake、甜品就完，輕鬆d。
待續...

傳菜

早前提過因為想3叔姐生女生得舒服d，所以當年放工就走去幫餐。

e家諗番，都好多得意野見過，同好多回憶。當年無論做富麗華定係富豪，都要白恤衫黑色褲，去到就揀件背心，背心有個英文名牌，所以可能今次我係Peter，下次就叫阿John。

初黎步到，蛇頭第一次實叫你做傳菜先，做枱就要先睇吓學吓，唔好急，遲d實有得你做。人工一樣，都係$75，不過要比$5蛇頭。

傳菜就係捧碟餸由廚房到枱比做枱同事分，唔好以為容易呀，碟餸好重架！試過有次出西蘭花帶子，唔記得前面行第5定第6個位仁兄，去到廚房門口就仆低，一地都係，個經理即刻叫停，出咗果d照去，淨低d攞返黎比大廚再分過，當然分薄晒啦。好彩個大鑊仲有d，都唔算好薄。然後拿拿聲出番場，d賓客都唔知出過事。

一地都係西蘭花帶子當然要掃走啦，仆低位仁兄都即時被掃走，而且叫蛇頭永不錄用。

至於點解個大鑊仲有d西蘭花帶子呢？原來凡親煮咗好野（當年帶子幾貴架），d廚房都留番d，等各部門大佬放工入廚房食架，好識做架！

待續...

弊！我最近又鍾意咗一個女仔

弊！我最近又鍾意咗一個女仔，年紀，仲好細添，點呢？每次佢出現，我都忍唔住，望實佢......

https://www.youtube.com/watch?v=eZkxb9TOS2I

https://www.youtube.com/watch?v=JjC6oLXj8SA

Thank you 麥奀記-忠記

3叔姐昨日發現唔見咗副眼鏡，遍尋不獲，開聲搵我e個搵野專家幫手。做得搵野專家梗係小心聆聽3叔姐講述幾時用過眼鏡既經過，然後，鎖定：應該漏咗響永吉街既麥奀記。



今日去到麥奀記，兩個阿姐好興奮，爭住話：你唔係漏咗呀，你跌咗呀，我地執番收埋架.....

多謝，thank you 麥奀記，and 唔該兩位阿姐

一月十四好日子

今日雖然星期5，但相信係結婚好日子，一早返工就見到花車。我又好彩，收到兩張請柬，可惜分身乏術，唯有同事果邊做人情而同3叔姐一齊出席佢認識幾十年朋友娶身抱既宴會。

e家去飲都見到主人家費盡心思，攪新意思去娛賓，加上酒樓（煌府）又落本，所以第一次見到新郎新娘咁樣出場：



新郎哥更加自彈自唱，成隊樂隊咁唱到敬酒至停。

可惜，食野方面好違憾，因為半圍人唔用公筷。所以，第一轉如果唔夠人快，比人落咗筷子之後，就唯有放低隻更，飲啖茶，等下一味喇！或者影吓朋友個孫女

無良政府

政府，簡單講，係從人民中選一批人出黎，幫大家做事。係幫人，唔係擾民。好可惜，香港個政府，卻係一個擾民既政府。

• 特首發晦氣話，要響18區都起骨灰龕，有無攪錯呀，不如起個響你隔離先啦。我唔信如果要起，柴記、和記、將軍澳等現成地無地方起；起18層高都得呀！

• 政府話要申亞，你e家話申，出句聲攪掂，但係洗錢係使2023年d錢，到時實有錢架？而且落手落腳做野d人好辛苦架。好似老電年年攪 Sport & Fun Day，e兩年無攪不知幾多人拍爛手掌；

• 樓價咁高，政府袖手旁觀，係咁意出d招壓壓樓價，但係普通市民買得起咩？市民居住問題係政府責任黎架，快d起d公屋，降低入息限額，話之佢d私樓賣到十萬蚊呎啦！

• 照顧市民健康又係政府責任，政府唔加醫療開支，要市民自己買保險，去私家睇，有無攪錯呀！我以為大陸至會有姐！有錢至好病呀！

• 出生率唔夠政府居然夠膽死殺校，雖然e家縮住班先，點解唔繼續資助學校呢，少d學生咪少d學生囉！可以upgrade做優質教學呀！教育資源都想縮！

• 特首又話老有所養，政府d老人院宿位少得可憐。d老人家老到死都無人照顧 (應該係無錢請人照顧)，隨街行，隨處食。政府又唔肯出錢買多d護老院位......唉！真係等到個老人家死咗都未批個政府買位。

越講越慶收唔到手添。

• 仲有，搵埋搵埋市民咁多錢，用咁多人工請“免責”官員，又儲埋咁多儲備，連人地外國商會都睇唔過眼，話你多得滯，鬍鬚曾你唔使問市民意見喇，講你都唔會聽，一於一人派5萬啦！有香港永久性居民身份証就要派！即刻派！

小牛的秘密：1/32 中美混血兒

這是一個關於小牛的秘密。

• 小牛的父親有兩兄弟，小牛的父親是大哥；

• 小牛父親的父親有三兄弟，小牛父親的父親又是大哥;

• 小牛父親父親的父親有n兄弟，小牛父親父親的父親排第四或者第五，唔肯定；

• 小牛父親父親父親的父親有兩兄弟一個姊妹，小牛父親父親父親的父親兩兄弟都是行船的，可能因為他們的父親都是行船的；

• 即是說：小牛父親父親父親父親的父親是行船的（清朝期間），當他的船到達夏威夷，上了岸，認識了一位外國女仕（即係鬼婆），結了婚，生了兩仔一女。其後，小牛父親父親父親父親的父親去世了，他的外國太太將女兒嫁到馬來亞（當時仍未改名馬來西亞）的怡保，兩個仔被帶到香港一個陳姓家庭寄養，她自己去了加拿大的維多利亞。

小牛的秘密：1/32 中美混血兒！！！

2011 第一個 Party with 維多利亞幼稚園 Friend Club

同 Friend Club 每年一度的『紅男綠女大比拼』已經因為留港人數越來越少而暫停了數年。但係，飲飲食食、嘻嘻哈哈的聚一聚仍然不變。

一如以往，每 family 出兩個餸 (有人打矛波，整咗3個)。不過無玩改名比賽了。

曾宅：玩轉冬瓜盅，入面有好多寶架！


清一式白菜，都可以砌到咁靚。


骨肉分離咸味雞，保持水準


Eva ：紙包飛排，焗得好香


西班牙式焗魚，可惜我唔鍾意食魚，唔知乜野味。


越式焗咖哩鴨


3叔姐：順德家鄉魚餅 and 生菜包。




屋主：意大利薄意粉


大籠蒸糯米蟹






屋主仲有噴火焦糖香蕉雪糕，可惜掛住食，唔記得影。





最後輪到 Sarah 安排既 games ：估估吓同埋 Pictionary。估估吓 d 題目都唔易做，例如“產後抑鬱症”“成人紙尿片”“自戀”等等；Pictionary 抽到“周柏豪”，仲要合埋眼劃出o黎.......又幾好玩！






希望 2011 係一個平平安安嘅 2011