極上大x屋日本料理

日前同孖仔堂細佬一行3公婆6個人聚一聚，試過尖沙咀嘅“極上大x屋日本料理”，好得，所以放上黎推介一下。

自從七姊妹道間“御日居”無做之後，我地幾兄弟頓失聚腳點！一係就唔好食、一係就唔好坐。今次極上大喜慶都坐得好迫，不過好食，我地食lunch，2百幾，放題3個鐘，OK！新鮮、好味、好服務！

電影資料館內搵到『南國電影』

電影資料館於2001年開幕，我到e家先至入去，認真慚愧。

入到去，電影院要有電影放先至入得、展覽廳展覽緊陳年攝影機又唔準影相，入到資料中心.......只不過好似圖書館咁！無乜野睇！







正想離開資料中心，赫然發現有書架放咗『南國電影』！

網上相片

『南國電影』係陪住我長大嘅雜誌，想當年，同兩位堂兄各有偶像：

老健 - 李菁
老強 - 秦萍
3叔公 - 何莉莉
男演員 - 狄龍

當時見到佢地d相就儲......

e家仲可以響網上搵到d相 :

李菁

秦萍

何莉莉

狄龍

e家講番出黎都驚比人笑，不過，當年十幾歲，鍾意『明星』應該好正常。當年『明星』好有星味，唔輕易出黎見人！一出就好轟動。e家嘅『演員』，應該唔容易做返以前『明星』嘅感覺！

講番本『南國電影』，當年3叔公都寫過信去“徵友”，就係咁，識咗筆友Suli！今次竟然比我響第188期（每本$1.50）搵到自己個名，都幾得意（可惜唔準影相或者影印）。

脫疆野馬

一家之煮e個角色好唔易做，人多食飯就做到嘔，人少食飯又唔知煮乜。

如果一個星期要煮6餐，每餐都係得兩個人食，長期黎講真係好悶，寧願落街食。

落街食最好就係乾手淨腳，食完走得！唔好處就多囉！貴啦、無益啦、食得多咗啦……

為健康著想，3叔姐寧願自己煮，就算e期廚房特別熱、就算去到街市都唔知買乜餸、就算......

今日約咗大表姐、Mon姐同女婿返黎食，唔知3叔姐係興奮定開心過度，心情有如脫疆野馬，準備咗9餸1湯，5個人食！

• 白灼蝦
• 蒜茸姜蔥蒸蟹
• 家鄉魚餅
• 煎釀豆腐
• 炒白菜心
• 蝦仁炒蛋
• 煎釀茄子 / 尖椒
• 洋蔥泡菜黑豚肉
• 果皮蒸龍躉魚片
• 蕃茄薯仔紅蘿蔔煲紅衫魚湯

佢真係屈得太耐喇！

食唔食得晒？大表姐同女婿聽日都有飯帶囉！

猿人爭霸戰：猩凶崛起(3D版) - 75分，發人深醒！

原打算開畫第一日就睇，一見$90張飛，唔睇，去書展，等今日早場$60至睇，精明掛！原來早場咁正，平d少人d！以前星期六淨係識返公司做野…死蠢！

套戲好發人深醒，病毒已經攪到人類差d絕種，如果連能源都耗盡咁點呢？唔係講笑，會有e一日！到時真係可能由原始動物佔據番個世界。佢地唔使電、無電腦、無fb…通通生存到，只有人生存唔到！

其實套戲主要唔係講e d，亦都唔係打到飛起嘅災難片，而係將猿人人性化咗，有善良、有憎惡，人不犯我我不犯人…如果套戲光d咁個3D仲正！

如果人類有番d人性、有番d善良就唔會打咗架馬航落黎啦！

3號風球去書展

今晚屋企無飯開，自由活動，於是放工走去會展行書展。

今日書展第二日，以為好多人，結果掂行掂過，隊都唔使排，可能關打風事啦！



入場費$25，貴咗d，不過今日入場有特別安排，就係票尾可以響星期5、6、日7點後再次入場，唔使再買飛！

一向都鍾意睇書，不過更鍾意買，有時買咗書一陣就睇晒，有時睇極都睇唔完。今次自由自在行書展，一於唔使急唔使趕，睇到好想買先至買。終於，7點入場行到10點，3個鐘只係行得一個場，買咗9本書，買咗$275。

右下角3本袋裝書好抵，$十蚊3本；左下嘅18樓C座賣$20

關世界盃事

等緊睇阿根廷對德國，3點開波。

轉下眼兩個星期過去，4年一度嘅世界盃到咗今晚決賽！時間過得真快！

響6月9號，我連分組賽邊隊對邊隊嘅情況都未知之下，響玻璃寫咗巴西、荷蘭、西班牙、阿根廷4個名，預計決賽離唔開e4隊，仲簽埋名。結果比德國殺咗入決賽，衰咗！

其實世界盃咁受歡迎，點解唔兩年一次！

如果真係兩年一次就弊喇，涯更抵夜、無寫BLOG、成日要攞半日假下奏至返工、睇完12點果場響梳化瞓到4點又睇........

原來唔覺唔覺，e兩個星期生活已經出現咗好大變化，而咁大變化真係好關世界盃事架！

好喇，過咗今晚回復正常喇！

識咗3叔姐37年

今日 (2014.07.01) 係識咗3叔姐37年紀念。

我地雖然唔係一識就拍拖 (當時佢係我上司，點得咁快哩！http://sbmlc21.blogspot.hk/2014/04/blog-post_27.html )，不過，都開始得好快。

初期拍拖都算順利，無人介意我搵得少；又無人話我細過3叔姐唔好！班姨甥仔女又唔反對，結果，6年後結婚。仲記得接新娘果日，3叔姐家姐對我話：“好好對我個妹呀！”.......如果e家家姐聽到，我會同妳講：“我無令妳失望！”

結咗婚廿幾年之後，大舅爺響佢個孫擺滿月酒時都當眾讚我.....大致係我對佢個妹好啦！佢好放心之類啦！

Banner幅相想影好耐！當時拍拖出街一齊行有好多姿勢：搭膊、繞手、攬腰.....我地覺得最好係『拖手』，一個肯拖、一個肯被拖。

有時響街見到一對老人家仲拖住手，都幾羡慕。所以e家出街都仲有拖手架，安全d唔怕跌哩！而且唔拖手好易一前一後，各有各行！

希望可以同3叔姐一路拖住啦！