---------- 新居入伙 ----------

新居入伙，別有一番感受。

 一生人流流長，總會試過搬屋，有人搬大屋有人搬細屋，但係點搬都好，都會盤算下傢俬點放、裝修點整，同埋乜野要乜野唔要。

好似今次要搬離Yahoo BLOG，有悲有喜，雖然唔舍得舊居，不過“新居入伙”，總有 d 興奮，可以 plan 下 d 野點放。只係唔知新居又可以"住"幾耐!

http://blog.yahoo.com/_MT4TVG2UJHDHCDKG6Y24X4F33U/articles

白宮末日 - 81分，睇得過隱

又係臨開場至趕到去買飛，無辦法，見後排有單人位就買，結果買咗一對肌餓男女隔離。前日睇『激戰』已經唔開心，隔離食完爆谷又食薯片，極度影響旁人。今日對肌餓男女仲離晒大譜，成個晚餐帶入戲院食，應該係兩個晚餐！有湯、有前菜、主菜、飲品，係差在未meet埋個橙。雖然我睇唔到亦唔得閒睇佢地食乜，但係我肯定有煎餃子，佢仲加埋喼汁至食。撲鼻嘅喼汁！！！你話係咪要『中』佢地兩野吖！

講番套戲，一貫大美國主義戲，劇情，哈！攞戲黎做！主角，遇到乜野危機都唔會有事！咁都好睇？係囉，比分仲高過『激戰』，真係激死張家輝。無辦法，人地美國大片，有戰機、有亞柏奇，有導彈，有美國總統……一句講晒：睇得過隱！

而且輕鬆笑位都多。有場戲講男主角同美國總統好緊急咁要上總統座駕逃走，男主角上咗司機位，美國總統好自然隨意咁想上後座…男主角大叫：坐前便啦！美國總統：習慣咗！

大美國主義都好嘅！起碼個結果一定開心。

激戰 — 80分，可以一看

無打算睇『激戰』，但之前有同事話唔錯，最重要係3叔姐都推介，所以.......睇咗！唔止睇咗，我都comment佢：可以一看！

唔好以為我嘅"可以一看"係麻麻咁解。我對港產片要求好高，等閒我都唔會睇，睇都好少讚，因為始終外語片大制作，抵睇好睇好多。(舊年嘅『鐵甲鋼拳』就好睇過『激戰』！)

『激戰』打鬥場面OK，唔多講。比較讚係張家輝式嘅攪笑，都頗多笑位。特別係“咀”果場戲！

劇情，有d攞戲黎做；果對母女角式有d牽強；d大隻佬，吸引女觀眾可以；音響唔錯！

好意外居然有梅婷做，雖然梅婷嘅化妝大部份時間都要黑眼圈，不過仍然遮唔住佢嘅冷艷，仲算好靚！

截糊

大約兩星期前，突然傳黎"康"表哥結婚嘅消息。咁突然！幾時呀？8月10號？點解一路無聲氣，突然話結就結？咁咪仲早過 Mon 姐？咁咪即係截糊？

我地唔係咢然佢點解結婚，其實佢地 (康表哥and Cindy) 拍咗拖起碼20年 (please correct me if 唔止20年)，我地咢然咁遲至結，仲以為佢地唔結，反正Mon姐過年照收佢地兩封利是。

終於尋日出席咗佢地簡單而隆重嘅婚禮，真係鄧佢地開心，特別係鄧康表哥興奮，Cindy 終於比番個名份佢喇！

倆個揸住張結婚証書都唔舍得放


結婚蛋糕超靚


響 IFC Red Bar 攪咗個 Wedding Party



恭喜Cindy & 康表哥，祝永遠相親相愛！

"巧"妙安排的掩口費

話說巧克力安排嘅求婚，有一個小插曲。當巧克力"吩咐"完3叔公做乜做物之後：

3叔公問：比唔比得 Mon 姐知有咁大札花架？

巧克力：唔比得佢知架！

3叔公：咁睇怕你要使d掩口費喎︵_︵

巧克力：.........

好喇，當求婚完畢，巧克力知道我地無洩露秘密之後，攞咗盒野出黎：嗱！掩口費呀！不過係比 Auntie 架！

儍仔黎架，講真講笑都唔識分，益晒間鋪頭.........................同埋3叔姐！

婚宴場地

Mon姐好忙：試婚紗、影（咗）結婚相、設計請柬、設計 backdrop、book 証婚、訂酒……

維多利亞幼稚園d Aunties 又開始發功，搵場地、講價、製作小食、相約造衫……

我同3叔姐有乜野做？做衫啦、準備賓客名單……遲d派請柬……都好多野做！

講番場地，今次多得 莎莉同大小姐倆位嘅出手，莎莉勝在識得人多，e度問下果度問下，識人又試圖講下價，點知，比大小姐截湖，上網睇完再到現場視察，跟住相約晚飯試菜，攪掂！

搵場地居然同搵老公老婆一樣，刻意找尋，又或者左揀右揀，往往失諸交臂，反而緣份一到，想走都走唔甩！

今次婚宴場地 - HK Regal Hotel 會包普通房一間。好好彩，我又輾轉識得入面高層，如果到時唔爆房就會 upgrade 一間套房，希望佢唔爆啦！

南生圍

終於有機會去南生圍。今日約好同兩個侄仔聚會，響元朗大榮華食過午餐，然後驅車入南生圍。



今日入南生圍？今日熱到出油喎！無錯，真係熱到出油；仲曬到出汁添！無錯，曬到出汁！唉，點都好過天陰落雨吖，天陰落雨就影唔到今日d相喇！



泊好車，去到橫水渡，比$5過河，就開始南生圍旅程。過程唔講喇，因為大把人去過，係我咁背幾十歲至第一次去。
























































6點已經到達元朗錦上路旦王花 – 泰越鍾情食晚餐

逛書展? 多謝！

每年動漫展同書展都人山人海勁多人，最怕"Big Chance"(迫餐死)，所以動漫展一次都未去過，書展偶然至去一次。

其實如果為咗執平書而去書展，唔使囉！因為出面嘅書店都會收『書展價』，起碼都8折，唔使入去迫。

於是，我又忍唔住，去大眾掃咗5本：

已經睇咗9集『三萬呎高空』，e家出第10集點可以唔買哩！



e本『香港周末逍遙遊』教點樣遊香港，當時攞起本書以為好多地方都去過，使唔使買書呀？慚愧，好多地方都唔識去，買咗佢第日去邊都容易d。



先排廣州自由行行出咗d興趣出黎，見e本『廣州旅遊全攻略』真係圖文並茂，如果要再廣州自由行點可以唔擁有佢哩！



睇區樂民響蘋果副刊嘅專欄好多年，好吸引，雖然有d題目都睇過，但係......點都要搵藉口買咗佢，買住第一集先。



睇好多日本旅遊書都係讚，e本居然講日本嘅驚恐，要買！



有人問我點解唔去圖書館借書，我係唔會嘅！因為，有一次，我見到有個人響鰂魚涌市政大廈圖書館借咗本金庸武俠小說，然後行到地下，入咗公廁，入埋格格，濕立立，我估佢即刻開工睇囉，想起都反胃！