3叔公BLOG: 6月 2014

2014年6月29日星期日

攞住相機四圍影

宅男生活好唔容易捱，除咗返工之外，幾個星期以黎淨係肯落街飲茶同睇戲，行吉之島都驚撞倒人，買完野就走，今日，見天朗氣清，攞住相機去山邊行下。

芒果樹開始有芒果bb喇！

唔知乜野黎

嘩，有隻大野響頭頂上方

聽街坊講有個印尼女傭由印尼帶咗e d 紅色花返黎種響山邊，e家有幾十棵

行行下突然烏雲密布

即走！返到屋企已經落出，哈哈！幾醒！

修理『朱義盛』

響公司同事有d乜野壞都比個機會我償試修理，例如：電腦唔郁、座椅甩手柄、風扇仔唔轉、影印機食紙、斷頸鍊.....講唔出嘅都有，我真係好使好用。

今次修理朱義盛，私人野，要帶返屋企整。其實我都唔明，黐野啫！咁都要搵我。

件朱義盛好似幾靚

睇真d，其實甩咗好多粒石，有d甩咗已經唔見咗

仲有耳環，6粒甩咗4粒

佢原本就係靠黐，唔甩有鬼

隻耳環粒石好細，要出動衫夾

整番，都幾靚，遠睇唔覺嘅！

2014年6月28日星期六

影Banner 相

為咗慶祝7月1日同3叔姐嘅相識37年紀念日，起咗影一張『拖手』相嘅念頭。於是，突然有一日興起，話影就影，出面落緊雨，就響屋企影啦！

『老婆，你伸隻手出黎對焦先！』

『換件衫先啦，一陣影到點算呀！』

『唔使梳頭啦，影唔到你個頭架！』

『支燈點解長開嘅？好光呀！』

『乜對手咁多筋嘅，一陣執執佢喎！』

『直拖定橫拖好呢？』

『yee！對手唔應該放左邊喎，左邊遮住個BLOG名呀！』

影相真係好多樂趣！

愛心住家飯

每次身體不適都會有3叔姐嘅欣勤照料，估唔到今次d牙出事（已經超過一個月），都特別炮製一d好野，幫我由失落、絕望之中提番起食野嘅味道同興趣，多謝3叔姐！我話下次佢病我都整番d好野比佢食，佢話：啋啋啋啋啋.....

焗叉燒

不知名蚌 & 鮑魚

齋雞 & 『第一刀』瘦肉

當造通菜軟

連老襯去完台灣都帶回我至愛嘅.....

感動！希望快d整番好d牙！

後加：愛心蘋果

2014年6月26日星期四

變形金剛 4 - 殲滅世紀 (3D) - 40分，超級制作、超級特技.....唔錯！but, 唔係我杯茶!

公映第一場就睇，絕對係好奇佢究竟拍到鰂魚涌點，當日 ( 舊年 ) 一大班人黎鰂魚涌睇景，並且租咗東滙酒樓5号廳放器材两日，每日$4萬，又鋪電線出英皇道……可惜要返工睇唔到佢點拍。

真利害，本來無一物，點樣整咁多變形金剛響度追打呢？

估唔到益發、益昌樓被睇中，更因為有勒索，增加咗知名度

主角就係響e d 騎樓簷蓬跳落去

除咗好奇，套戲都.......話佢唔好睇又唔係，差10分鐘做咗3個鐘，曾經瞓著、曾經睇到眼花撩亂、d變形金剛太過人性化，居然識傾偈、打到亂晒大籠，d外景戲有時變咗廠景，有時又去咗大陸，唔知就比佢嚇死，知就比佢激死！男主角唔型，女主角唔算靚！.......散場出字幕d觀眾一個二個起身走，唔似其他好睇嘅戲會坐多陣回味下。

都會有人話好睇, but唔係我杯茶！