嗅到魷魚香

差唔多成隊香港代表隊嘅南華，每個位置都起碼有兩個球員，其實拆兩隊出黎都夠踢嘅，南華今日竟然被深水埗迫和1-1。唉！你去邊度踢我就去到邊度捧場，你有無d令我失望呢？

今日南華竟然踢到“有心無力”。

入場睇南華，通常佢攻邊邊我就坐邊邊，今日下半場我就坐正深水埗龍門後面希望睇南華入波，可惜，睇唔到。




我估教練高世安都嗅到魷魚香喇！

眼鏡

12歲就開始戴近視眼鏡，註定我以後都要戴眼鏡。識咗3叔姐，佢無近視，唔使戴眼鏡，所以好羨慕佢。

有趣嘅係，e家兩個都有老花，去飲茶睇報紙時，3叔姐就要戴上佢嘅老花眼鏡，相反我就要除抵我副近視眼鏡。其實我副漸進近視鏡，唔除都得，除咗就舒服d囉，戴咗幾十年，舒服下啦！

文化差異

今晚行經銅鑼湾廣場一期Conino Lamboighini 男仕服裝店門囗，望入去，有两女一男國內同胞在揀衫，突見男同胞脫光上身，在枱上攞起件長袖過頭笠就試，咁都得?女同胞在旁比意見，售貨員我就見晤到，我同3叔姐就此行過，為怕佢再黎會試埋條褲!

波士頓餐廳

灣仔波士頓餐廳，間中都有入去食野，最出名係鐵板牛扒。

前幾日同幾個同事入去lunch，見到個伙計望住我，我同佢講：唔該5位丫。佢話：自己搵位丫！

止痛藥

不停地對住電腦，由早對到晚，膊頭想唔痛都幾難，今日仲痛到上頭，迫不得意，落萬0買合必理痛特效快速止痛藥，拍咗兩粒頂住先，然後約3叔姐放工出街食飯，relax一下。

想唔到咁快，特效快速止痛響20分鐘後生效，由少少痛到唔痛，唔使半個鐘，我又可以繼續做喇。同事話：你傻架？早d走休息下啦！咁又係，所以8點鐘走，同3叔姐去板長。

板長，都無乜野好講，好唔好食？唔好！貴唔貴？唔貴！服務得唔得？唔得！仲會唔會再幫襯？唔會！

食完行陣吉之島，返屋企沖埋涼，總算鬆咗d，唔使再食第2次止痛藥！

影耳環sample

膽粗粗應承朋友影耳環sample，用部Canon Pro-1 + 閃燈，加A4紙同鋼琴做背景就影。好彩朋友講明要求唔高，所以比我過到骨。

康蘭會BBQ

好耐好耐無BBQ喇，今次避免浪費食物，所以預算食物時都要報名，鮑魚邊個食？大蝦邊個食？

今次book康蘭會，包爐一個及枱椅，其他全部自己帶。好多謝各位靚太，專誠到香港仔買材料

開波喇！



一致推舉，大蝦最好味


第二係波蘿


必食項目，味道一般，除咗片頭


其中一欵腸


鮑魚


“魚立”魚


北寄貝


仲有好多食物架，例如朱扒、牛柳、番薯粟米、雜菇、雞全翼雞中翼、熱狗、腐竹糖水…埋單計數，每人$165

令人驚喜的旺角場

南華對港菁 旺角大球場 2:30PM

闊別旺角場兩年，趁今日南華有比賽，一早返公司趕做一d必做嘅report之後，就過旺角，入場睇下



成個場感覺好grand，布局好正，舒服，一人一個位，高角度望落去，兩隊波嘅組織同每個球員嘅表現都睇得一清二楚。好似基藍馬一拳打落辛祖度，全場都睇見，紅牌無得傾！

有人問我：你成日一個人睇波唔悶咩？我唔悶架，因為一定唔會得我一個人睇波架！

又有人問我：香港波有乜好睇吖！點解唔睇英超呀？我都想，但係我要睇現場囉！如果話望住個40”電視睇就話係睇英超，我話入場先至叫睇波囉，響屋企睇英超只可以叫“睇電視”。

睇下個場幾靚！

少談政治

讀得書少，所以好少高談濶論講政治。

但係睇完憎凸首最後嘅施政報告同埋答問大會嘅表現，實在希望佢帶埋公公早走早著。

希望下界凸首可以.......... sorry, 無得我希望

鐵甲鋼拳 - Highly Recommand - 90分

e期又做到溫溫燉燉，國慶返工，重陽做完應做嘅事之後又返工，星期6返工，星期日帶咗野返屋企做 … 平時晚飯差唔多10點至食。

今日趁響“大大鑊”開完會已經6點半，仲返公司? 去睇戲算啦！睇我想睇好耐嘅『鐵甲鋼拳』

套戲好正，睇到我有笑有淚；成套戲既刺激，又興奮。個細路仔演員做得好好好.......寸，個機械人好真。攝影取景我都好鍾意，highly recommand！男女o岩睇！

3叔姐今日都睇咗『作死不離3兄弟』，又係highly recommand，佢話要睇第2次

介口 — 好悶

今晚去飲Wincy嘅結婚酒，飲完番屋企坐緊地鐵時已經肚餓。唔係主人家酒微菜薄，而係自己好多嘢都唔敢食，或者食得多。睇見味味唔係油就咸，唔關人事，而係醫生告誡，唔介口就會越食越多藥。所以無辦法，要忍。

醫生話：出街d湯唔飲得，特別係例湯(慘!我最鍾意飲)，包裝礶裝果汁唔飲得，唔好食粥、西瓜、火腿、腸仔.......要少鹽少糖少味精少油, 唉!

無乜人生樂趣! 好悶!

最後恭喜Wincy新婚快樂。

唔關我事

今晚，荃加福祿壽探案

"戇戇居居去買麵~買著個蝦子麵~媽媽沖凉~爸爸耕田~由我去買麵­~爺爺失眠就開風扇~但喺冇曬電~我最節儉~用芭蕉扇來撥面~三­叔公 佢回頭鬧我~乜你咁曵未去買麵~"

入面既三叔公唔關我事，我係3叔公。

養魚

幾年前曾經養魚，普通淡水魚，孔雀、米奇、接吻之類，因為死得快，又貴，不如買魚食好過，所以將所有裝備比人，乾手淨腳。

一星期前同阿女行水族廣場，又比d休休閒閒嘅魚仔吸引住，終於，今日帶晒佢地返屋企。







辛苦工作一日之後，返到屋企望住一缸清澈嘅水，魚仔休閒嘅游來游去，幾舒服架。

默哀一分鐘

身為香港人，我支持李慧玲，為香港默哀一分鐘，因為煲呔居然升林公公做政務司長。

煲呔，你在侮辱香港人，你在毀滅香港。