個“Friend” 返咗黎！

之前為咗準備 Mon 姐的婚禮，刻意修身，結果反應良好，面頰瘦咗dd、腰圍細咗dd、體重輕咗dd。但係，婚禮完咗之後，又食多咗，又疏於運動，好明顯，個 "Friend" 好唔客氣，已經返咗黎！

飢餓遊戲 2 - 星火燎原 (The Hunger Games: Catching Fire) - 55分，期待下集

如果無睇第一集，應該唔容易明白套戲講乜。

第二集絕對比第一集好睇，因為：畫面更華麗、迫害更強大、特技更認真、Jennifer Lawrence更靚，講真如果套戲唔係Jennifer Lawrence做可能唔睇，佢第一集都仲未係影后，今集已經貴為奧斯卡影后喇！

不過，我比咗第一集50分，今集都只係55分，因為，套戲完得實在太差！為咗鋪排第三集，突然之間話完就完！我坐響位度見佢出字幕真係呆咗！

好期待，第三集嘅Jennifer Lawrence

http://zh.wikipedia.org/wiki/%E9%A3%A2%E9%A4%93%E9%81%8A%E6%88%B2%E4%B8%89%E9%83%A8%E6%9B%B2

初遊科學園

好難得入中大 (專誠入去恭喜 Kim 姐姐碩士畢業)，順路去一轉科學園，因為話去話去，咁多年都未去過。

邵逸夫堂

由大學站坐272K幾分鐘就到

一落巴士，咁大條街得幾個人，星期六12:00點，點解呢？

環境好正喎！

入去商場，大呀！好多野食，多番d人

雖然好多野食，都係揀咗飲茶

海邊又大又靜，點解咁遲至黎呢？

吐露港對岸有d建築都頗破壞氣氛

植物好多，但靚嘅就少

科學園，唔錯唔錯，得閒行過！

懷念Mon姐的睡房

Mon姐住咗15年嘅睡房，隨住佢嫁咗之後，無得保留喇！不過，唔係我同3叔姐無人情味，而係間房要變身遮！

其實Mon姐間房都係我同3叔姐嘅精心設計。當年見到間房細、點可以有齊：床、書台、電腦台、書櫃、衣櫃、雜物櫃.....經過左度右度之後，一間設備齊全嘅女仔房：

左邊書台，右邊電腦台，我仲用透明亞加力膠砌咗個組合架分隔開兩邊

當年去界d亞加力膠都界咗二百幾蚊，另外再買十蚊哥羅芳，用黎黐埋d膠片嘅！到e家都未爛！

5個書櫃筒，其中一個仲有鎖

上床要用樓梯櫃

樓梯櫃連結他都放得入

衣櫃，下面有櫃筒。不過有d計算錯誤，衣櫃太細！

Mon姐個小天地，床尾仲有空間放咗個書架。

一排書櫃，佢仲有隔開兩間房之用

響IKEA買嘅企身鏡

Mon姐張床可以望落街

e個角度應該係Mon姐由床上面見得最多嘅

影完相裝修師傅開始拆喇，鳴鳴鳴！

張床，無咗！

乜都無晒！

先睹為快，到時Mon姐返黎瞓就唔使摛上摛落！

3叔公的玩具車

響我個年代，好多玩具都自製，不過，車仔就點都要買。我都唔記得d錢點黎，可能係利是錢啦，否則我一定買唔起。

唔記得幾多錢喇，但睇下車底，Matchbox黎架！Made in England架！e家買都好貴啦！

*當年帶住e兩架“戰車”，由鰂魚涌行去筲箕灣6叔屋企，同堂兄弟們嘅戰車決一死戰。決戰方式係將一塊床板，一邊放響椅上，一邊放地下，用間尺先欄住兩架參賽嘅戰車，然後快手攞走間尺，兩架戰車即刻向下：衝呀！衝到最遠果架為勝！

咁都好玩？好！一班細路玩乜都好玩啦！我仲記得，輸咗靜雞雞入廚房滴d油落d轆度，以為可以快d，點知仲慢咗，因為滴咗『生油』。比堂細佬發現咗，笑到面都紅！

第一架戰車

第二架

名牌  Match Box

Made in England

希俊到訪，都有比果兩架車佢玩。
但係，請留意，佢開始玩時都仲穿著整齊，點知........

同3叔公玩到連pp都唔去，結果，濕晒！3叔姐醒，搵條毛巾比佢圍住先。

 *當年，如果無記錯，可能係65-66年期間。

愛的麵包魂 - 70分，意外驚喜

偶然響NOW衛視自選台睇到e套戲，帶住無乜期望之下睇下，哈！又幾好睇喎！一個法國人去到台灣鄉郊搵整麵包靈感同佢阿媽當年食過嘅最好味嘅麵包.....

都有好多台灣嘅地道人情味同笑料。男女主角又靚！

逃亡大計 (Escape Plan) - 30分，$65張飛食咗好過

我唔係歧視“老演員”，但係好似史泰龍咁，仲拍『逃亡大計』，又真係老咗d。加埋阿諾舒華申力加，算啦！身手遲鈍喇！拍埋e套好喇，再拍我唔睇喇！

劇情極度失望，原本條橋就無問題，自己逃出自己設計嘅監獄，不過佢硬加插一d呃史泰龍救阿諾嘅橋落去，睇到我眼花撩亂，比佢d人名攪到亂晒籠！

幾年前有套『逃』嘅電視劇，齋講點樣入獄，點樣救埋大佬走仲好睇。

一家4口慶祝生日

Mon 姐同巧克力拍拖期間，巧克力都好有心，每逢父親節、母親節、或者我地兩老生日等等，巧克力都有出席，同埋通常都爭贏比錢。

今年只不過係名正言順嘅：一家4口慶祝3叔姐生日。

3叔姐生日快樂

3叔姐，生日快樂呀！希望你.....

可以為所欲為！鍾意點就點！

Mon姐的婚禮

我地希望 Mon 姐同巧克力有一個既充滿回憶又感人嘅婚禮，所以，所有繁文縟節嘅程序都唔使，例如3朝回門，免喇！跪低斟茶，唔好 (不過佢地都唔同意，斟茶比父母都有跪) 。

所以，整日時間安排都好鬆動。

(大會相要3個月至有，所以e家嘅相都係其他親友影嘅)

Reception

March-in

『我地襯唔襯呀？』

比spot light射住，睇唔得好清楚四周人物同景物

特首証婚?

3叔公準備簽名

this table 來自佛山！

女主家席

新人致詞

3叔公 and 3叔姐都認真地聽下佢兩個嘅情深說話

響送花比外母嘅環節，3叔姐終於.....

母女雙擁，感動落淚！

3叔公同事

Victoria Kindergarten Friend Club 

整個“Mon 姐的婚禮”，之前已經講過得到好多人嘅幫手，好多謝佢地，我唔長氣講完又講喇，反而想講下一d花絮:

• 接完新娘開始斟茶時間，原本安排咗姊妹 F 扮演大衿姐幫手捧茶，姊妹 F 發覺條姊妹裙頗低胸，驚事業線上鏡......，姊妹 W 自告奮勇，話：『等我黎！我無................................走光！』。
• 未婚男親友 B 響席間見到靚姊妹 J，同 Mon 姐講想問姊妹J攞電話。Mon 姐話：佢結咗婚喇！男親友 B：^o^
• March-in 時有5個花仔花女帶頭，其中3個行得頗快，好快已經響視線之外。而小牛小兔行得較慢，我起碼踼咗小牛腳跟兩次.....終於，我同 Mon 姐連彎都唔記得轉，直行到台前將 Mon 姐交咗比巧克力！
• 敬酒時小牛好興奮，舉起酒杯，大聲對住3叔姐嘅三家姐叫：我要同3叔姐飲！我要同3叔姐飲！哈哈！佢飲大咗，認錯人！
• 姊妹 S 聽 Mon 姐致詞時一度感觸落淚，旁邊兄弟 F 似乎早有準備，唔知幾時已經準備好紙巾，輕描淡寫遞上
  
• 睇番上面幅相，原來姊妹 J 一早已經....熱淚盈眶
• .
• .
• .
• 應該仲有，諗到再加！