時移勢易

時移勢易通常講以前點樣點樣，e家已經咁樣咁樣.....但我嘅電話佬回憶錄係要倒轉黎講：

• e家裝電話箱，用電鑽鑽4個窿，再用電鑼絲批上鑼絲；以前要用鎚用麻根針一下一下鑿4個窿，用手上鑼絲.....

• e家放線用casing，釘槍，以前要釘馬仔，橫6吋直9吋，不能太密或太疏，一路夾住條線，如果牆太硬，要先用針仔鑿窿，再塞dd報紙粒入個窿塞至可以落馬仔。

• e家去五金鋪買針仔，以前要自己磿，用支好粗鑼絲，用個手磿，一邊攪一邊磿，正式鐵柱磿成針。

• e家用手提電話同機樓或同事聯絡，以前用聽耳 (headphone) cut開條電話線拍叉。

• e家試電話線有無斷線或濕水用電表度，以前用聽耳細心聽有無聲或者"沙沙"聲就大約估到邊度壞。

• e家有野壞就換，以前有野壞就整。

• e家修理同事出街要帶notebook，circuit board.....好多待換零件，所以背囊，手拉行李箱或手提袋帶齊，以前一個"架生"袋，常用工具只有3個：cutter，鑼絲批及聽耳，盡量整唔到至換。

• e家"科佬"會自動經mobile飛落部data手機度，以前起碼半小時要打次電話返control攞野做。

• e家109收到電話壞會自動做測試，要派人上門又會自動send維修資料比修理伙記，以前接線生要將客戶講嘅資料先寫上docket，文員再攞docket去櫃筒搵個客張卡比control，好似睇醫生咁，張卡有客名同地址，及以往維修紀錄......做完一次"科佬"control又要填番d紀錄....放返入櫃筒。

• 以前d接線生可以偷聽電話，在所管轄的區域，要聽邊個就邊個，但要小心，先mute個mic，再慢慢click入去，講緊電話兩個人一定唔知，但係有少少細聲，間中有客會懷疑被人偷聽.........公司發現又無合理解釋，炒完連大糧都無。

• 以前100條線通常最多23個人用，第24個想用就冇線，冇線又以為電話壞...打風落大雨好多人想打電話總係冇線就係e個原因。

回憶住咁多先。

香港危難控制中心

香港危難控制中心個名係我自己改嘅，因為我根本唔知佢個名，只知道一旦香港有事，好危急、失控、甚至連港督都準備要走，e個中心就會坐齊人，利用入面嘅通訊器材去指揮出面。

中心地處政府合署Main Block地庫，據帶我入去做保養嘅仁兄講，地庫有3條可行車通道，可通往港督府及添馬艦等，而添馬艦果邊有小戰艦或者直升機接應，隨時走人。

而中心內嘅電話系統叫做LME Concentrator，除咗有普通街線外，仲有好多條已經駁通咗嘅直線，只須按一個掣，對面嘅電話就會響，對面嘅電話當然包括各重要政府機關及警署、消防、添馬艦英軍總部.....可免提多線路通話，當時唔係好多同事識整架！

保養，主要是度電池水，無就要加(加蒸餾水)，做test call，條條線都要做，用省銅水清潔耳筒plug...... 總之就要個系統隨時可以用得。

以上資料 over 30年喇，e家應該仲有一個危難控制中心，我當然唔知響邊啦。不過e家回憶起來，做電話佬真係帶比我好多見識。

吞pok (蛇王)

吞pok，行行都有，電話佬吞pok，通常去飲茶，因為每日實有"茶錢"。

朝朝8點3之前攞order，跟住去倉補充d零件，就去飲茶。其實唔飲茶都唔知去邊，因為太早，公司未開門，我做半山d客更加未起身，除非學校啦！聖保羅，Island School之類就有人。

飲茶有兩個竇，飲中去英京，飲西去拱北行。我鍾意飲中，因為跟住"將軍" (當時一位幫辦級同事)，佢好多野講，好好笑。淨係聽佢講溝女就笑死人。點心阿姐問"魚翅飽"，"魚翅餃"，邊個食？將軍扮阿姐話"唔似貓"，"唔似狗"唔好食。飲到8點11唔使出聲各有各放低錢就走人開工啦，將軍會埋單。

有時唔係有心吞pok，當無order就要等。但係當時人工低，無咁多錢飲茶，所以我就會去兵頭花園、太子行 Shop嘅休息室、政府合署的民政署休息室(識人至入得)、康樂大廈電話房、郵政總局海旁、卜公碼頭....通常都係睇武俠小說，或者瞓一陣，都試過皇后戲院睇12點半.....

記得有一次見好多同事去大快活，我都去一次啦，點知一去就領野。話說當日4點幾，去到大快活已經有7、8個同事到咗，坐埋角落頭吹水，你一言我一語，都幾嘈。嘈咗一陣，工程師突然出現，全部捉哂。返到機樓，鬧到飛起。鬧完之後，放軟聲氣同我地講：你地去還去，唔好7、8個人坐人幾張枱，飲兩杯野咁少吖！如果唔係大快活唔會打去109投訴話有班電話佬唔食野霸住d位架！又嘈！

激氣！以後唔幫襯大快活！(當時一時氣憤講咋)

Private Wire嘅功用

Private Wire = 私家線，係租比某公司/機構專用，點到點，唔使同其他人share。好似警鐘線由銀行直到Chubb、報價線由交易所直至股票公司、播音線由大球場直到香港電台再播出街、派彩線由馬會直到投注站.......

近日聽天文台不時發出酷熱天氣報告，令我想起當日摛上亞畢諾道一個政府建築物天台，check一條 private wire。原來條 private wire係天文台租用，由該天台一個溫度計，經數據轉換，送訊號返天文台，咁，天文台d職員就可以坐響度就知道香港各處既氣溫幾多度喇。

今次張 order就係佢地發現無訊號收到，所以，我就有野做喇！

當年天文台可以即時有香港各區嘅溫度資料全靠電話線

見識日式夜總會

咁大個人都未出去滾過，連夜總會都未入過。不過有晚當rota，竟然有間灣仔夜總會嘅 keyline系統有科佬。好似係???，已經唔記得個名。

可能仲早啦，5點幾，入到去，有人吸緊塵，有人裝飾緊，有人練緊歌，有人返工，返工d女士都後生架，著得比普通好d，但唔係中環look....

可能好耐無搵過人整套機，套機都好多問題，有個寫字樓女人叫我慢慢做，唔使急，幫佢地check哂d分機，不過，7點半要收工，因為佢地要開工......

差唔多7點，有人試燈光，練緊歌d人唱得越尼越好，有伙計陸逐standby喇，d小姐又陸逐換好衫出尼喇，嘩，正好多喎，清一式高叉祺袍，個叉高到差唔多到加拿大，yeeee？點解咁高叉都見唔到底底邊？好多疑問。

7點半之前整好走人，已經有客入喇。忍唔住想睇睇出去滾d人係點既。所以企響門口對面等。等咗幾個字，有人出黎，中年人，拖住個小姐，個小姐已經變左身，著番casual look，牛仔褲高踭鞋，靚女，除非親眼見，否則，外表只係當佢地拍拖，唔似滾！

開補水(開OT)

"科佬"多就會要求伙記開補水，我通常都樂意。當年開補水計工半，我大約$8.00一個鐘，工半即係$12，一係唔開，一開就4個鐘，5點放工後開始計OT，至9點，都有接近$50。$50好好，因為儲緊錢結婚，開咗個零錢整付戶口，每個月儲$2,500，一年就$30,000，3年就$90,000，差唔多啦！

當年月薪都無$2,500，但儲$2,500全靠補水，同埋所有使用都係用3叔姐嘅。

補水4個鐘響其他區無問題，我e家仍間中見到夜晚有人修理電話，但中環唔得，因為公司放工之後無人，所以，我日頭跑得好快，跑多幾單，control就肯早d，大約4點半mark夠日頭，然後比8單OT我 (平均計半小時做一單)，我一揸住OT order，plan下行程，即刻踩行摩打，5點半，最多5點9做哂！唔信？睇下我嘅方法啦：

- 早收工嘅公司先做，遲收工嘅遲做，例如 Chubb，連卡佛等，夜d都無問題。
- 去到一見難做，mark暫用，同客講要換野，明早一早再黎。
- 打電話問客有乜壞，有時 SMO (Subscriber Mis-operation)，電話教番佢，都唔使去。
- 好多都真係做，但中環有幾大？太古、太子、歷山、康樂大廈、過埋和記、美國銀行中心、同美利道停車場 ICAC 都有天橋穿黎穿去。最多過去士丹利街、陸佑行、恆生......幾步路，車都唔使搭。
- 好多時日頭有 TT (Trainee Technician) 跟，有個 TT (詹仔)勁有上進心，學咗我好多野，連開補水都要學，TT 無補水開架，但他堅持唔收工，繼續幫我"咩"袋，開行turbo跟出跟入，因為佢要學埋點樣一個鐘做8單..... 所以有兩個人一齊時更快。

不過開OT日子唔係好長，因為升咗級....加咗人工，無得計OT錢。

險死於希爾頓酒店(已拆)

有日帶住TT (Trainee Technician)雄仔開工，想唔到，差d返唔到屋企。

話說當日所有中環“科佬”做哂 (我當時主要負責匯豐、太古、太子行、歷山、康樂大廈一帶)，無所事事，入去Hilton 酒店實有野做。果然，餅房有電話壞，去到餅房，一攞起聽筒，無聲，九成斷咗線，就同雄仔跟跟條線，跟到出走廊，條線被4塊板遮住，就想逐塊板搬開睇睇........

一搬，好好好好好重，搬唔起，板嘅下半部郁都唔郁，但上半部比我搬郁咗，好重，d板原來唔係普通板，原來係電梯內裝響電梯壁嘅鐵板，放響走廊電梯門口等換。e個當然係事後至知啦，但係d板放得太企喇，一塊郁帶郁埋4塊一齊郁，我已經用盡飲奶力雙手齊推，點知一d作用都無，d板已經極速向我頭頂壓落黎，死喇！我不得不跪低，轟隆4聲，玩完！

好彩，個走廊得大約5呎闊，但d板足有10呎高，佢地比我背後個牆頂住，而我就跪響下面，好像一個直角三角型，我就跪響直角位！感謝主，真好彩，否則我已經扁咗。

雄仔逐塊板扶番起，我先至一額汗咁企番起身。

打完風入大嶼山

(模擬照片，有支棟就快倒下，好危險，棟，即係電話柱 (telephone pole)，通常綠色，響新界及離島比較易見到)

聽到上司講，今次場風 (已經唔記得邊場颱風) 掃低大嶼山同長洲好多電話線，中環同事要去幫，邊個邊個去大嶼山，邊個邊個去長洲....（我就做完大嶼山再去長洲，第一晚收工都唔返屋企瞓，響長洲海事處 office d 椅度瞓，第日一早又做過！）

去到大嶼山派咗我跟 Leslie (花名)，好有型，著人字拖，揸架棉羊仔，叫聲我坐穩，卜卜卜卜咁就由梅窩機樓出發，我坐後面，背住架生袋，拿著兩大"滾"線，都無手扶住.....第一次坐棉羊仔，第一次去大嶼山做科佬，個體驗都好得意。

張Order係去一條村，得10伙人，9個電話壞咗，差d同外界無哂聯絡，去到，兩條友分工合作，一人爬一支棟，逐駁逐駁，駁番d線，或者放過條新線。Leslie 身手不凡，著住人字拖，爬得快過我，我慢好多，因為爬唔慣，得舖牛力，無乜技巧.........爬到上去，扣住安全帶，雙腳撑住 pole step，雙手在駁線，眼就四圍望，高高在上，好high架........帶去d線用哂，要第日再黎，結果兩日做好，村民都好感激我地。有飲有食之外，仲有大包自家曬梅菜帶走。

兩日內十幾team同事已經修復哂d電話，但都未完工，再用多幾日4圍檢查有無危棟。講真，電話公司以前服務好好架。

約美心Reception去影相

電話佬跟大公司d接線生或者Reception都好有緣, 當然有成功結婚嘅例子, 亦有等放工都無用嘅例子, 但我就成功約到當年美心總部 Reception - Carol去影相, 不過都只係限於影相囉, 因為入老電之前已經識左3叔姐, 人地話唔好為咗棵樹犧牲個森林, 但我果棵樹已經開花結果, 咁, 唔可以攪攪震喇, 只不過剛剛買了部 

Canon AE-1 Program, 

點忍呀! 得3叔姐批准, 膽粗粗約 Carol去彭福公園, 終於一個想影相, 一個想比人影相, 一拍即合.

現在同 Carol做埋街坊, 計一計, 識左佢都30年了.

修理名人電話

有一日接到會德豐大廈環球船務有電話壞嘅order，原來係包玉剛秘書嘅電話壞。一邊修理，一邊聽見包玉剛響辦公室內講英文電話，英文唔算流利，但絕無斷斷續續……..

有一日接到華人行長江實業有電話壞嘅order，原來係李嘉誠嘅電話壞，李嘉誠當時唔響公司，我可以一邊整一邊欣賞個office。設備都好簡單，當差唔多整好，有個男人走入尼叫我執野，因為李生剛入升降機，好快上到來，好彩剛剛整好，出番尼佢都未到……..

又有一日政府合署main block有分機壞，上到一樓行到尾，一入房即刻見到英女王幅相，原來個房係夏鼎基嘅辦公室……..

维基百科，自由的百科全书
包玉剛（Yue-Kong Pao，1918年—1991年）係以前世界8大船王之一，環球航運集團始創人。包玉剛鄉下嚮浙江省寧波市鎮海，阿爸係包兆龍，都係個生意人。而家九龍倉集團主席吳光正，係包玉剛個二女婿。經中國大陸學者考究，包玉剛係宋朝龍圖閣大學士包拯嘅第廿九世孫，據寧波天一閣包氏宗譜推算。

夏鼎基爵士，KBE，CMG，JP（Sir Charles Philip Haddon-Cave，1925年7月6日—1999年9月28日），香港前政府高官，歷任財政司及布政司。他曾在其他英國海外屬土服務，1962年起服務香港政府和香港市民，直至1985年5月30日退休。之後返回英國定居。1999年在英病逝。他是香港金融體系的奠定者，定下香港政府理財哲學。香港政府理財原則(即「積極不干預」政策)：量入為出，政府減少對市場干預，小政府大市場為主。位於香港中文大學的「夏鼎基運動場」是紀念他對香港的貢獻。

休息站：兵頭花園

我開gang嘅地盤響半山，包括纜車線東面嘅堅尼地道、麥當奴道、寶雲道、波老道及纜車線西面嘅堅道、羅便臣道、干德道、西摩道等，及所有有關打直嘅街道，例如德己笠街、嘉咸街等。

當年未有上山電梯，通常一早要坐23號A或者12號上山，再由高做落低，一對摩打腳，日日百萬行都唔止。

當兩邊山都無科佬，我就會走去兩邊山中間嘅兵頭花園坐，等科佬同埋休息。

當年無手機，離開用戶家就無電話打，除非有公眾電話。兵頭花園當然有電話亭啦！電話佬見到公眾電話就有計，可以打109叫同事駁線，因為control就響109後面，通常都肯駁，最多問你幾號“冧把”。如果唔想麻煩109，就拍叉，就係利用公眾電話掛聽筒個勾，控制到剛剛收線與唔收線之間，2字就拍兩下，9字就拍9下，好易打通，通常20分鐘就打一次，有野做就走，無野做就睇武俠小說，我記得天龍八部都比我響兵頭花園睇咗兩次。

兵頭花園好正，空氣好，有花睇，有動物睇，又可以睇人影相。

好懷念！

響匯豐銀行舊總行見到好多現金

如果半山真係無電話壞, 就要落山，落山後通常做愛丁堡廣場一帶d大廈，包括舊匯豐總行。

舊匯豐總行，一座極grand嘅建築物，大堂宏偉，感覺涼浸浸嘅，中間一條通道上二樓，兩邊係櫃台...........唔記得詳細環境喇，不過仲有兩個深刻印象 :

1) 大堂放線只可以放明線，因為雲石地板，麻石樓梯，無預設喉通，有都爆晒，唯有放明線，放明線只准黐唔淮釘。

2) 有一次有機會入保險庫，手續都麻煩，但不及域多利監房，過兩度鐵門，入到去，嘩！錢呀！兩張乒乓波台咁長嘅一張台上，全部係錢，山咁高，一班人坐兩邊數錢，原來一叠叠銀紙由機器數過，要再經人手數多次，先至用紙綑好。

依世人都未見過咁多現金。

舊匯豐總行響1978年尾拆咗喇。( 我都有幸見證到新舊匯豐總行嘅存在！)

夜探山頂盧吉道30號

有一晚當夜，已經8點半，滿以為實無驚無險，又到9點，點知 control 收到一位外籍女士電話，因為個仔入咗醫院，擔心醫院隨時有電話打黎，如果電話有壞就弊啦，所以要搵人檢查一下個電話機同條電話線，make sure無問題，所以，唔去唔得。

急忙飛的上山頂，去到盧吉道口，司機見到個禁區牌，弊！唔入得！高級住宅，的士想入要先去山頂警署攞禁區紙，唯有落車行入去啦！

點解咁大霧呢? 霧大到得10幾呎視野，有無鬼呢? 有無狗呢? 有無蛇呢? 撞唔撞到人呢? 30號究竟嚮邊呢? 點解行極都未到？街燈好遠至有一支，就算有都好昏暗。左手攞電筒，右手揸支長鏍絲批，胡思亂想，沿途數住號碼，去到一個分叉口，左定右呢? 好辛苦先至見到兩個路牌，一個夏力道，一個盧吉道，（請睇下圖）

(e張相可以見到左邊夏力道右邊盧吉道，幅相年初三 (16 Feb 2010) 影，當時人山人海，但請想像，平時嘅夜晚9點經過e度，舉目無親，濃霧圍繞嘅境況) 

終於9點2入到屋，間屋好大，得一位外籍女士響屋企，其實佢應該仲驚過我！ 我小心check哂所有要check嘅，要走喇，外籍女士猛say thank you。

好記得入去時乜都遇唔到，用咗20分鐘，但走番出大路只用咗10分鐘，更奇嘅係，走出去時遇到 1) 兩男一女散步，2) 一位男士放狗，3) 路邊木椅有兩個人坐著傾偈。

我已經話之你，走得快好世界。 出到小巴站坐小巴落山，走去德己笠街食碗雲吞麵，舒服晒！晚上10點! 覺得好叻，幫到人。


e家每次經過盧吉道30號都停步望下。(睇下30號個門牌幾難睇到！)

出入域多利監房

有一日接到域多利監房修理電話嘅order。

域多利監房響大館上面，都係我負責範圍之內，所以間中都要入去。

通常去到更房門口報到，然後問清楚邊個分機壞，及壞機位置，位置好緊要，如果響監房出面，可以掛著証件自出自入，但如果響監房內就麻煩，點麻煩？要人帶，無關修理嘅通通要放低響更房，包括隨身用品，銀包，原子筆，甚至要除皮帶，除鞋帶，只淮帶登記咗嘅工具。入到去，唔好望犯人，拿拿聲整，整完即走，如果出番去對過d物品唔齊仲煩，不過我未試過。

都試過靜雞雞望下單人倉，入面真係得一張石屎床，床後有幅矮牆仔，之後有個蹲廁，有個洗手盆，就係咁，除了辦大事蹲低比人睇唔到之外，做乜都比人睇哂。

仲敢收茶錢?

我開gang做“科佬”時ICAC已經成立咗 (1974年成立)，但每次上門修理完電話，d客仲習慣比茶錢，我必定禮貌地婉拒，但有時都婉拒失敗。

• 有一次幫一位老人家整完電話要走，老人家隻手已經揸住d錢，話比我飲茶，我當然say no啦！同老人家講，唔使比錢架，修理係免費架，點知佢一手掟晒d錢入我“架生袋”，即刻砰聲柵埋門。我返到屋企，"摷"哂d錢出尼，一毫，兩毫，五毫都有，夾埋個半銀錢。

• 有個星期六朝早響一個馬主屋企修理電話，見佢個“攪盤”幾舊，於是換咗個新攪盤比佢，馬主高興，叫阿四比$50我，突然又問我：師傅你賭唔賭馬架？賭就比隻貼士你，當時死蠢嘅我話：我唔識賭架！佢隨即叫阿四換過張$100，嘩！我當時人工每個月得$885.-咋 ( e家講番出尼唔知會唔會比ICAC拉呢？)

• 又有次唔記得年初幾，港督府有電話壞，（當時港督係麥理浩）。 去到，原來司機宿舍壞電話，整完，走人，個司機突然比封利是我，吓！港督府都比茶錢，佢話，新年流流，收啦！咁多謝晒喎！係青蟹一張。

* 開gang即係話我大個仔，可以獨自一個人做科佬

** 科佬 = fault

關帝保佑邊個多d?

做電話佬好多年, 但做上門修理電話就得兩年經歷, 不過, 兩年都可以遇過好多難忘事.

有一日，先後接到兩張order.

第一張 : 荷李活道大館，雜差房有電話壞。入到雜差房，一邊整電話，一邊四圍望，最吸引我嘅係一個關帝神位，神位足有2呎闊3呎高，設備齊全，原來差人做野要關帝撐嘅.

第二張 : 士丹頓街某財務公司有電話壞。入到去，又係一邊整電話一邊四圍望，成個office得4張寫字台，我發現每張台底都有支壘球棒，但係最吸引我嘅，係一個關帝神位，神位足有4呎闊6呎高，座地，大過大館雜差房果個3倍，簡直大到唔信，成個關帝像，人咁高!

究竟，關帝會唔會根據邊個神位大就保佑邊個多d呢？

見工與升級試

考完會考，做咗兩份暑期工，就入紙考電話公司同埋救護隊目(即係一架十字車內嘅兩柴)。救護隊目考先，要過3關，第一關體能，考10項全能，包括單槓、雙槓、sit up、背人、掌上壓、來回跑、爬繩、鴨仔跳、上落樓梯....第十樣唔記得，每項10分，我有84分，全場第3高分，但第二關考英文筆試，肥咗，所以第三關面試都唔使考就bye-bye.

電話公司見工都好唔簡單，要過5關，包括：筆試、人事部面試、見工程師、驗身及照肺。驗身好核突，個醫生居然連有無痔瘡都要check，想唔到見工遮，連身都失埋。全部通過之後要我揀：地線、安裝或者修理，終於揀咗修理，一做就做到e家，32年來，轉過幾個post但係都同修理有關。

所以咁多年黎自問工作經驗豐富，但係見工經驗就甚少。

入職後做 TT (Trainee Technician)跟人及入學堂，9個月後開 gang，one man gang，專做半山住宅電話，3個月後帶人....15年內升咗5級....第一次考升級試係 Technician 升 TO2 (二級技術主任)，面對4個人，包括人事部，chairman 及兩個工程師，全英文對答，人事部問我咁 young，如何能勝任、工程師問一條線由 DP (Distuibution Point) 至客最長可以放幾長、另一條問有客投訴你有個伙記無禮貌同講粗口，點處理？Chairman問如果升到級做野同未升級有乜唔同。唉！廣東話都好難答啦，仲要明珠台，點知又比我升咗。