由2009年8月28日起,三叔公改為3叔公

偶然用search找一找"三叔公", 發現起碼4個, 所以決定避重就輕, 改為3叔公, 各位網友不用傷心, 網名尼姐!

3叔公

Time, Money & Energy

今日 SuFen send 來e-mail, 講人生有3個階段, 都包含 time, money and energy :

1) 青少年期 : 有 time 有 energy 但無 money

2) 在職成年 : 有 money 有 energy 但無 time

3) 年長老年 : 有 time 有 money 但無 energy

鍾伯與鍾伯母

鍾伯花名叫"利害", 但他說他們東莞人發音是"利悔". 花名就勁, 但賭錢就好唔勁.

第一次見他是他娶新抱, 我做攝影師, 第二次是他的浸禮, 又是我影相. 鍾伯在受浸見証中說他如何利害, 一朝早去澳門打個轉回來開檔(在灣仔當小販賣女性用品及飾物), 鍾伯母一d無發覺. 輸了錢轉頭勤力點賣, 錢很快又回來, 他常說女人錢最易搵. 但貪勝不知輸, 加上賭隱太深, 輸掉超過200萬, 同家人關系當然極差. 還好是他終於接受兒子勸說, 讓主耶穌親自拯救他,他決定受浸, 並在眾人面前認錯, 多謝家人原諒, 及接受耶穌為他的救主.

鍾伯母好人, 好人不用多說了, 但好人運氣不好. 先是老公爛賭, 然後自己爆血管(但復原得無事一樣), 再然後肚痛醫醫下居然細菌入侵落腳, 要鋸去一只腳.

早前到檔口探他們, 他們見到我好高興, 鍾伯例牌捉住我對手話好耐唔見, 跟住又講下個孫,鍾伯母就笑容滿面話現在每日都是賺回來的.

在我面前, 兩個基督徒, 活生生的見証.

營銷電話

最近手機有些營銷電話打來, 我都作出回應:

1) 我代表渣打打尼, 請問你最近有無好多卡數未清呀? 我話: 你代表渣打? 你有無check下我個渣打戶口有幾多存款至打尼呀? 佢話: 無呀, 咁無野喇! 對唔住呀!

2) 我代表必瘦站打尼......我話: 必瘦! 我已經瘦到得90幾磅...

3) 我地係AEON財務, 請問你最近有無財政困難呀? 我話: 無呀. 佢話: 咁你想唔想借d錢用下? 我話: 唔想. ...問左幾個問題後佢終於無奈地收線.

由客人變成朋友

如果三叔姐開夜場, 夜晚無飯開, 都鍾意走去七姊妹道御逸居, 一個人食個碎魚生飯, 加多$1, 有3件唔薄三文魚生. 老闆娘姚姑娘通常如果唔送沙律, 就送兩件櫻花餅, 用日本紅豆做. 依個櫻花餅, 有錢買唔到, 要師傅心情靚, 或者有熟客到(例如我)才會做出尼, 送. 飲埋碗湯, 都好飽!

姚姑娘有時又倒兩杯Sake, 一人一杯, 然後開始閒話家常; 另一位御逸居partner又會坐埋尼, 研究下食物相點至影得再靚d; 伙計阿芬見到我都笑面迎人地幫我搵個靚位…

其實我只是他們其中一位客人, 但又相處得像朋友.

將客戶變成朋友

將客戶變成朋友有很多方法, 食是其中一種.

而食的地點又最好是客戶工作的機構, 有他的面子, 他的簽單, 及或多或少的送甜品送糖水著數, 再由我來付款, 皆大歡喜.

帝苑的Le Soleil越南菜有雜誌介紹又有朋友介紹, 加上認識帝苑一位經理, 所以正好相約試試.

叫了3頭盤1沙律3主菜及粉麵飯, 都好有水準(可惜名稱都已被我忘記得一乾二淨), 除了一個蝦醬扎肉炒飯最正要多碟, 牛柳絲生菜包都好.

越南氣氛就無乜, 不過地方高級, 約朋友食飯最好.

咁都得?

在H1N1橫行的日子居然比我見到....

某日在新釗記食早餐, 見前兩排卡位有位仁兄左手掩住口, 打了個乞嚏, 隨即起身出去埋單, 經過張工作台, 見有條 " 祝君早安 " 在台上, 他居然將左手揩在毛巾上, 並繼續走去埋單, 若無其事, 咁都得?

我唯有話比伙計知洗洗條毛巾.

點解仲要幫襯?

最討厭食大家樂大快活之類快餐店, 尤其是早餐時間, 先排隊買, 再排隊等食物, 等完食物仲要拿著食物搵位, 價錢仲唔平添, 真受罪. 好似今晚, 趕睇"竊聽風雲"便粗粗地在康怡吉野家食, 排隊買野時仲遇到前面位長者買左好耐, 企後面等 EQ低 d 都發脾氣.

茶餐廳就唔同, 搵位坐低, 落完 order 就等食.

同褔三位少年人確診H1N1

同褔堂, 沒有涼茶賣, 亦不是甚麼堂口, 他是一間基督教教會. 由幾十人租用利園酒店崇拜, 到現在位於中央圖書館旁的會址已經超過3000人

在同褔堂有幸參與了10多年的攝影事奉, 所以每次影浸禮都聽到得救見証. 有占掛算命, 病人, 爛賭, 吸毒, 自殺, 反叛青年, 去滾....當然仲有好多好人見証. 張堅庭, 鄧箤雯, 羅慧娟, 毛浚輝, 楊玉梅, 楊英偉...都是我影的受浸相.

有個得救見証我還記得 : 有位失婚女士同離婚丈夫大吵一場後好失落, 兒子又在澳洲讀書, 一個人孤零零, 剛剛當日中秋節, 人家團圓做節, 自己就一個人, 好痛苦, 便生了自殺念頭, 臨死前打電話去澳洲同兒子道別, 兒子一聽, 大吃一驚, 但奈何身在澳洲, 唯有叫阿媽求其搵間教會求救, 女士漫無目的由柴灣去到北角北宣, 見北宣中秋節休息, 覺得算啦, 走去海邊跳海啦, 但對腳又繼續向前行, 過咗中央圖書館, 突然有個女仔走埋去話 : "主祝福妳!", 送咗個月餅比佢, 仲請佢參加當晚同褔堂舉辦的 "中秋愛宴". 當晚, 女士深深感受到被關懷, 被接受, 愛是那麼的無條件, 那麼的真. 一個月後她告訴兒子她信耶穌了.

下次再講另一個見証.

求主醫治三位少年人的H1N1, 及叫人認識衛生的重要, 別隨意破壞環境生態.