3叔公BLOG: 10月 2010

2010年10月27日星期三

小器

自問唔係小器既人，但係覺得有人做野真係好孤寒。

話說今日城中熱話，三胞胎個爺爺歡天喜地，抱著d孫，跟住宣布每名員工，一人一封萬元大利是。其實今次已經唔係首次，之前抱女孫已經派過利是。

我地個潮州主席生完單又生雙，紅雞蛋都無隻食。

紅雞蛋算得乜？就算百元千元利是又算得乜？孤寒囉！

『飲橙汁』，連渣都食埋

自從買入貴夫人，阿女愛上左『飲橙汁』，唔係，應該話係『食橙』，連渣都食埋。目的係要增加維他命C。

口感相當正。個貴夫人好易清洗，真係沖下就得，因為攪到渣都無。

2010年10月26日星期二

Happy Birthday to Sandwiches

Sandwiches今日生日，光臨寒舍，3叔姐準備左幾味家常小菜：

有：白米溝紅米飯

帶子蒸蛋

清炒介蘭

瑤柱草菇豆腐

雲耳蒸雞

蓮藕肉餅

西芹紅椒炒蝦仁桂花魚片

and 椰子、鮑魚、花膠煲雞湯

＊我洗碗洗煲洗鑊洗左半個鐘

2010年10月25日星期一

手信

阿女第一次無同埋一齊去旅行，又交帶唔使買手信，回程時在飛機上都忍唔住買左個裝化妝品袋仔 (e個牌子) 比佢，

如果無記錯應該賣$300

我星期六響上環街邊見到賣緊差唔多一模一樣既袋：賣$38。

大小姐d北極光相

維多利亞Friend Club兩位女會員莎莉同大小姐舊年組團 (終於成團得3位女士) 去睇北極光，3叔公同3叔姐都無參加，因為費用昂貴，又要放頗長假期。當日無一齊去，無後悔，但係有d遺憾。

行程：由香港出發、去溫哥華、落西雅圖，再坐飛機去阿拉斯加。真係少d錢少d時間都去唔到。

算喇，睇下佢地d相算喇。

e幅就係我所講既"天使"喇 :

d星星又大粒又光

只係用普通儍瓜機仔影

多謝大小姐d相。

2010年10月24日星期日

看得我目定口呆的靚相

每一張相，都看得我目定口呆；每一張相，都係任何一個影相佬都想拍到的相。

最後一張：3叔姐作品 - 3叔公在大峽谷全神貫注取景的一刻

2010年10月22日星期五

榮休宴

今晚已經係近期出席既第四個榮休宴。做人情平均$300一餐。無辦法，識得人多，唔通識左三十年既同事走都唔見下？又做唔到囉！

響公司做到榮休，有人話光榮，有人話恐怖。

如果超過55歲加上做滿15年，公司會有金牌送贈，差唔多重兩半。e家金價咁高，都幾好喇。

我仍須努力，做多幾年至夠資格，希望到時d金價又再貴d啦！

2010年10月21日星期四

女同事塊面有蟲

有女同事去做面部護理，被職員用一個毛孔放大機在面上慢慢掃來掃去，由電視機睇番毛孔狀況，嚇然見到毛孔有蟲仔娟個頭出尼！嚇死，肉眼無辦法見到。之後職員用激光將蟲激死！！！

e家塊面有激光激過的地方有d紅，佢話遲d就會好番。

2010年10月18日星期一

大小便不分裝

星期日聽收音機：

阿A問阿B：『點解你d頭髮成日都響中間分界o既？』

阿B：『形囉！e d 叫“大小便不分裝”。』

阿A：『點解個名咁得意叫“大小便不分裝”o既？』

阿B：『梗係啦！唔通叫“大小便分開裝”咩！』

2010年10月17日星期日

OMG - 南華對屯門 0-0

今年少左提南華，唔係無睇，而係打得差唔想提。好似今日，響公司做到3:20，然後飛巴（788）落小西灣捧場，落車4:10，約左德仔剛剛好。

入到場巡例同德仔估下幾比幾，我話贏5比0。結果，0比0，慘失兩分，仲比傑志爬頭上左榜首。

無野好講，快d返屋企，因為住多倫多既堂大佬夫婦尼食飯。

世博單日入場人數再破紀錄

當日杭州上海遊第一日入世博遇正國內中秋假期，所以有份參與創下單日入場紀錄：63萬。不過今日睇明報話剛剛被破了：

新紀錄係100萬。睇下幅相，唉！處處都big chance，入到場都入唔到館啦。大陸為左破日本1970年6000萬紀錄，係咁組團係咁放人入，報紙話已經6000幾萬喇！大陸真係好多野缺，人就唔缺！佢要動員起來都幾恐怖。

2010年10月14日星期四

今晚得兩支公開飯，不如唔煮，去附近食泰國野。第一次幫襯，得我地兩個客 (8:30pm)，叫左兩個套餐：泰式炒豬肉河同海南雞飯，另加椰菜苗同芒果糯米飯。食完巡例問3叔姐：仲會唔會幫襯？佢話：都會。埋單，$108。

離開食肆，我同3叔姐異口同聲：好抵喎！

不過，一齊計計，套餐@$35，已經$70，唔通椰菜苗+芒果糯米飯收$38？計錯數。走番轉頭，鋪頭d人幾對眼望住我，講晒"沙話地卡"。我道明來意，比機會佢計多次，原來收少$35，比番佢。佢地好客氣，猛講泰國話我都唔識聽。

一路行番屋企，心情好輕鬆，其實每次執到銀包、手機等等比番人之後，都有e個感覺。

2010年10月11日星期一

上海 - 杜月笙

聽過杜月笙個名好耐，但無留意。今次跟團個導遊好有心機講歷史比我地聽，特別提起杜月笙同黃金榮。所以臨上機響上海浦東機場見到e本書，買左佢。

簡體字，人民幣39.80，有成347頁，都好抵。因為得返工放工坐地鐵時睇，e家都係睇得一半。
杜月笙事蹟就唔好提喇，作奸犯科，壞事做盡，不過本書就有好多舊上海資料同當年租界既歷史，睇完都好想去多次自由行。

2010年10月10日星期日

飲茶

因為4高，所以偏向飲茶。

通常屋企飲六安，3叔姐鍾意趁英記減價時買。六安好香，有親朋戚友到訪時食完飯響廚房沖六安，未出廚房門口d人都問：好香，乜野茶呀？

出街飲茶會飲水仙，初初唔鍾意飲，初初淨係識叫普洱，但係水仙飲多左就好鍾意佢經過喉嚨果個味同感覺。好多酒樓（高級d果d）無水仙，通常沖壺鐵觀音出尼，但係完全唔係果回事，味都唔同。

響公司會飲龍井，唔知點解，上午做到10點幾或者下午做到4點幾就開始烏下烏下，又唔想飲咁多咖啡 (e家每日唔敢飲超過一杯，因為咖啡因吸鐵質，飲得多貧血，會骨質梳鬆)，所以飲龍井，甘甘地，飲完個口好有清新感。不過響深圳買既cheap野唔包括在內，因為cheap一陣草青味，唔甘。

今日Twins媽送尼好靚（個盒）龍井一合，真係感激流涕。在此講聲多謝

，並祝Twins媽：好心有好報，事事如意，青春常駐，身體安康。

2010年10月8日星期五

10.10.10

後日就係10年10月10日，好多情侶都選擇e日拉埋天窗。各大酒樓酒店e日既龍鳳大禮堂一早已經book滿晒，收晒訂。

但係，有傳聞話，當你好想e日結婚，但苦無地方之時，有人(例如酒樓個經理)會話你知，比3倍訂金就有人可以讓個地方比你。例如，有人用$20,000訂左酒席，你只要比$60,000佢，佢就寧願唔要訂金就讓個位比你，咁樣，計計條數，佢就$40,000，酒樓就$20,000。

如果係真，e盤生意有做。只要有本錢，就去訂定一d熱門日子，例如12月25、2月14、1011年10月11日或者11年11月11日之類.......既酒席。

2010年10月3日星期日

杭州上海遊-一幅正相

杭州上海遊之後，團友們紛紛upload所拍相片上網，其中，我未經同意，亦都唔理佢同唔同意（因為佢都未經我同意就影我相），來個copy and paste，貼e幅相上尼。

以往去旅行好煩，因為起碼兩部相機一部video，仲記得去大峽谷果個trip，連支大腳架都帶埋，菲林都帶100筒，成隻駱駝咁....e家輕鬆得多喇，正式一機走天涯，而且，效果又ok喎。

e幅相見到我隔住旅遊巴玻璃影相，其實我好多相都係由旅遊巴上，隔住玻璃影出去，又郁，又反光，目標又稍蹤即逝，我又老花......唯有將鏡頭盡量貼埋玻璃，用盡最快快門，借隻左手做枕.......影到咁多相番尼，都唔容易架。