3叔公BLOG: 1月 2013

2013年1月22日星期二

彩虹蛋糕

『爸爸，我想買乜.......；媽媽，我想買物.......』相信e兩句要求成日都會掛響小朋友咀邊，但係Mon姐好少囉。少到有時問下佢想唔想買d乜呀？想買d野比佢添。

早兩日忽然聽見佢話想食『彩虹蛋糕』，所以唔等佢買，我就先下手為強，買咗一個大家試下。

估勿論好唔好食，淨睇樣已經好開心，Mon姐自放棉花糖，到見到入面咁七彩，都一臉驚喜，不停讚靚。

至於好唔好味，OK啦，唔食cream好d。

2013年1月20日星期日

Xen Coffee

一杯$36 Xen 秘調咖啡，入到我囗中，跟一杯屋企沖最普通嘅雀巢即溶無乜分別，都係24味咁嘅味。

咁点解佢賣$36都幫襯? 因為可以坐到幾時都無人騷擾我。

其實我等緊剪頭髮。師傅今日好忙，剪完兩個就會叫我，所以過隔離飲咖啡。

愛心意粉

3叔姐今晚又試整另一款意粉。

題目叫愛心意粉，原因係材料又係比我揀，今次冧庄帶子、蝦（其實兩樣都係雪櫃嘅存貨），加埋脆肉瓜。

好味！

2013年1月13日星期日

姨甥仔女孫到訪

難得今日3叔姐班香港嘅姨甥仔女孫到訪（係呀，其中一個係姨甥孫呀！）（係呀，香港果班咋，佛山仲有4個姨甥仔女加埋愛人孫仔孫女等等夾埋又15個呀！黎齊間屋連企都無位！）。

今日咁齊人到訪極有可能係第2次，不過對上一次係15年前。3叔姐班香港嘅姨甥仔女都事業有成，有響法庭出入嘅、有響邊境話事嘅、有響海上執法嘅、有響……都唔方便寫得咁誇張，總之3叔姐見到佢地就安慰啦。

順便計下先！我同3叔姐都最細，所以有：

侄仔女連愛人叫我地3叔3嬸有 7個
侄孫叫我地3叔公3叔姐有 2個
姪仔女連愛人叫我地5姑丈5姑姐有 3個
姪孫叫我地5丈公5姑婆有 3個
姨甥仔女連愛人叫我地5姨丈5E有 16個
姨甥孫叫我地5姨哥5姨姐有 8個
堂侄仔女連愛人叫我地阿叔阿嬸有 9個
堂外甥仔女連愛人叫我地舅父舅母有 6個
堂外甥孫叫我地舅公舅婆有 2個
表侄仔女連愛人叫我地表叔表嬸有 5個
表侄孫叫我地表叔公表叔婆有 2個
表外甥仔女連愛人叫我地表舅父表舅母有5個

暫時68個！

2013年1月11日星期五

義工

間中有時間都會做義工。

曾經一家3口同義務工作發展局做家庭義工時比人邀請上台講感受，仲登咗報紙。

e期3叔姐逢星期二會上牛頭角一個由教會主理嘅大廚房幫手，有時幫洗、有時幫切，煮就會由正式受薪廚師負責。

煮好嘅飯餸會有其他義工送往有需要人士。

2013年1月6日星期日

一家3口行公園

好難得一家3口食完lunch一齊去行下公園——鰂魚涌公園and愛秩序灣公園，再順道落東大街掃街（食街邊）。

筲箕灣變化好大，所到之處，全部填海填出來，仲填得好出。記得以前太安樓下面就係海，e家差唔多填咗成一公里咁出，太古城、鯉景灣、嘉亨灣、逸濤灣同埋愛秩序灣d公屋居屋全部起響填海之上。

鰂魚涌公園