3叔公BLOG: 電影/電視/演唱會

顯示具有 電影/電視/演唱會 標籤的文章。顯示所有文章

2014年11月17日星期一

《別相信任何人》（Before I Go to Sleep）/《星際啟示錄》（Interstellar）

一連睇咗兩套戲。

睇《別相信任何人》因為Mon姐借本書比我睇，每晚瞓前睇，Before I go to sleep 吖嘛，點知睇兩頁就瞓著，睇咗好多晚都睇唔完，不過又想知結局，所以…

套戲都好忠於原著，即係話，一樣咁眼瞓！好彩，係Nicole Kidman 做，淨睇佢已經抵番晒。結局…估到啦！不過估唔到佢幾暴力！ - 45分

睇《星際啟示錄》因為廣告吸引。劇情唔好提，e類科幻片嘅劇情講咗都唔明！不過其中有3場戲好精彩，一場響海度遇到山咁高嘅浪、一場穿越d冰雲、一場進入個蟲洞。套戲超過3個鐘，長得滯！ - 55分

2014年8月14日星期四

LUCY:超能煞姬 - 個半小時的騙局 - 30分

出到摩根費曼響大學講人腦開發多幾個%已經好勁，講到似層層！果邊廂塞d野入肚爆散咗，個腦被開發多100%，即刻變超人！佢點講都得架啦。

明報星期日仲有個影評比佢4粒半星，唉！騙局！

不過最尾有一幕響現代嘅紐約返到石器時代.......再返到天地未開......又都好精彩！

2014年7月19日星期六

原打算開畫第一日就睇，一見$90張飛，唔睇，去書展，等今日早場$60至睇，精明掛！原來早場咁正，平d少人d！以前星期六淨係識返公司做野…死蠢！

套戲好發人深醒，病毒已經攪到人類差d絕種，如果連能源都耗盡咁點呢？唔係講笑，會有e一日！到時真係可能由原始動物佔據番個世界。佢地唔使電、無電腦、無fb…通通生存到，只有人生存唔到！

其實套戲主要唔係講e d，亦都唔係打到飛起嘅災難片，而係將猿人人性化咗，有善良、有憎惡，人不犯我我不犯人…如果套戲光d咁個3D仲正！

如果人類有番d人性、有番d善良就唔會打咗架馬航落黎啦！

2014年6月26日星期四

變形金剛 4 - 殲滅世紀 (3D) - 40分，超級制作、超級特技.....唔錯！but, 唔係我杯茶!

公映第一場就睇，絕對係好奇佢究竟拍到鰂魚涌點，當日 ( 舊年 ) 一大班人黎鰂魚涌睇景，並且租咗東滙酒樓5号廳放器材两日，每日$4萬，又鋪電線出英皇道……可惜要返工睇唔到佢點拍。

真利害，本來無一物，點樣整咁多變形金剛響度追打呢？

估唔到益發、益昌樓被睇中，更因為有勒索，增加咗知名度

主角就係響e d 騎樓簷蓬跳落去

除咗好奇，套戲都.......話佢唔好睇又唔係，差10分鐘做咗3個鐘，曾經瞓著、曾經睇到眼花撩亂、d變形金剛太過人性化，居然識傾偈、打到亂晒大籠，d外景戲有時變咗廠景，有時又去咗大陸，唔知就比佢嚇死，知就比佢激死！男主角唔型，女主角唔算靚！.......散場出字幕d觀眾一個二個起身走，唔似其他好睇嘅戲會坐多陣回味下。

都會有人話好睇, but唔係我杯茶！

2014年6月6日星期五

竊聽風雲3 - 20分, highly recommend 唔好睇

20分係比周迅架，戲內唯一一個無貪念嘅人，演得好自然，又靚。

套戲：

驚險：無
懸疑：無
攪笑：無
粗口：討厭
造型：核突，特別係方中信
演技：好悶，特別係葉璇
大場面：無
人情味：得少少

講到新界無個好人，賭錢吸毒賣丁權！個個都貪；甚至羅蘭為咗幫手攪攪震要打交都要加$100人工！

都唔知咁多人力物力財力拍一套咁嘅戲目的係乜？仲浪費咗我兩張coupon添！(咁難得同3叔姐睇戲！) 可惜！

2014年6月1日星期日

變種特攻：未來同盟戰 - 55分，口水多過茶

套戲已經做咗超過一星期，所以好老定咁4點2去到廣怡買4點5飛，點知，得頭兩行！唔係嘛？一張飛咋喎！卡窿位都無？唉，第二行得邊位，即係要買第一行，唔睇！

即check太古城，聽日至有得做。心想，都黎到啦，4點4，仲未開場，買第一行啦！

其實賣飛個妹妹已經提我第一行好近架，真係，頭岳岳咗5分鐘頸都痛埋，走喇！寧願去最後面企響度睇。

又企咗5分鐘，見佢最後排有6個spare救急位始終無人坐？咁我唔客氣喇！由第一行變咗坐最後.....

講番套戲先！

睇科幻片真係好怕佢口水多過茶！變種特攻已經拍咗好多集，你都唔使成日講返以前！對白又多！剪接都唔好，成日『現在』『過去』飛來飛去！都比佢55分全靠兩場戲：

響廚房個超級慢鏡既自然，又迫真，講個『快閃俠』快到一殺那間安排好晒d子彈點飛，然後黎真嘅......
『萬磁王』整起個圓形運動場，飛去白宮上面再“蓬”一聲放落去，好震撼.......

2014年5月29日星期四

異空戰士 (3D) - 65分，有d失望

往往，希望越大失望越大：

女主角唔靚
湯告魯斯=湯告老斯
打鬥場面混亂
隻“野”好平凡

還好，佢條“橋”得，不停從頭打過，打到爆機為止。就係佢掛住講條“橋”，其他地方就兼顧唔到。

其他comment :

3D好靚
大場面有睇頭

$95一張飛好貴，唔抵，加上隔離又坐埋d低等民族，真係破壞氣氛：

明明係科幻戰爭災難片，佢係又笑唔係又笑，成間戲院得佢笑
食野，一陣味
食野，sock sock 聲
隻手伸入袋攞野食，沙沙聲
講電話，有聲
開電話，有光
討厭!!!!!

2014年5月10日星期六

蜘蛛俠2 決戰電魔 (2D) - 10分，極度失望

一套咁大套嘅科幻巨片，票房又話咁好，影評又寫得咁勁，點差都三四十分，但係因為佢收$80，我有d被騙感覺，所以出手都唔手軟！10分！唔係十分好睇，而係十分失望，100滿分佢得10分。

一向科幻片都唔使乜野劇情，一開場交待下就打啦，佢講咗一個鐘！

個電魔本來係人，突然變成電魔，求求其其話變就變，人又點會比電電幾野就變魔呢？已經電死咗啦！就算唔死都比d魚咬死！不如求其話外星飛個電魔黎算啦！

蜘蛛俠，血肉之軀，就算佢有自我療傷本能，又點可能唔怕電？

最好笑，條街已經打到爛晒，d市民仲企響行人路度好似睇爆水喉咁睇。

唔係我杯茶。

2014年4月6日星期日

DoctorX-2 – 85分

用兩晚半時間掃完DoctorX之後，乘勝追擊，繼續睇DoctorX-2，趁今日掃完墓、返歸再睇埋南華對南區嘅比賽錄影之後，即刻開工，剛睇完第7集，應該仲有2集就ko佢！

自從大長今之後都未試過咁顛！

DoctorX-2比DoctorX少打5分，無乜特別原因，亦唔係無咁好睇，佢依然拍得過隱，節奏明快，所言有物.......少5分係少咗d新鮮感啫！

我同Mon姐講，e套戲嘅角式好簡單，兩種：第1種得一個演員，就係米倉涼子做嘅大門未知子，係一個醫術超勁有原則嘅freelance醫生；第2種係其他演員，佢地都係飾演醫生，角色名稱分別係癈柴醫生A、癈柴醫生B、癈柴醫生C......癈柴醫生Z.......好似其他戲嘅路人甲、路人乙、路人丙咁！個個唔係唔敢做手術就係做錯，連院長都夠胆打開咗見做唔到想縫番埋佢，結果又係米倉執手尾。

坦白講，好睇！米倉涼子，做得好得意！

2014年4月3日星期四

DoctorX – 90分

趁3叔姐外遊，無人爭電視，結果一晚睇3集，用咗兩晚半時間睇晒8集DoctorX，正！

唔係淨係得韓劇架，日劇都好睇架。

DoctorX劇情略誇張，但係我信佢講e家嘅醫療架構真係幾腐敗。明爭暗鬥、行賄、擦鞋、聯朋結黨，好彩，仲有個大門未知子，唔埋堆，淨係醫人。

e家開始，睇DoctorX 2！

2014年4月2日星期三

分歧者: 異類叛逃 - 75分

好睇！女主角Shailene Woodley好靚，特別係打散頭髮時仲靚，拍得住"饑餓遊戲"嘅 Jennifer Lawrence.

套戲同"饑餓遊戲"都幾似，都係講將人類分組，男女主角作反一齊對付惡人.......。

我揀戲睇係要娛樂性高，包括刺激、女主角靚、劇情估佢唔到、好人得勝.....e套都比到我。其中講女主角最後過關被測試思想個過程好精彩！好睇過"饑餓遊戲"少少。

Shailene Woodley

Jennifer Lawrence

2014年3月29日星期六

挪亞：滅世啟示 - 60分

挪亞：滅世啟示

上半part我只當科幻片睇，特別係佢d石頭人出場，簡直好似睇緊變形金剛咁。下半part講到成個世界得番佢地船上幾個，仲繁唔繁衍落去呢？神想點呢？e part都好值得深思。

都係唔好當宗教啟示片睇，當睇一場138分鐘嘅科幻特技片睇算喇！

2014年3月14日星期五

直航殺機 (Non-Stop) - 75分

睇『絕地孤軍』見到『直航殺機』嘅畫頭，好刺激，廿分鐘殺一個人、救人者反被陷害、機尾炸開大窿……雖然近日有馬航事件陰影，都忍唔住，7點收工走人趕返廣怡睇8點場。

講番套戲，條『橋』都算正，一個保護飛機乘客嘅特警被劫機者玩弄於股掌中，佢用盡方法都搵唔到劫機者，但係人就死完一個又一個！好耐未睇過一套我好想知答案嘅戲喇……時間一分一分咁過，真係幾緊張！

可惜，結果真係！唉！草草收場，扣分！

2014年3月2日星期日

絕地孤軍 (Lone Survivor) - 70分

比70分絕對唔係因為套戲好睇，戰爭片絕對唔好睇，殘忍！

比70分係因為拍得好"近"，近到好似親歷其境，近到好似想打埋一份。超刺激！

好多影評都講唔出4個海豹陸戰隊員點解被困並且孤立無援！因為，佢地信錯“先進”嘅通訊設備，無論無綫電或者衛星電話都無用，最後只係靠一個阿伯+一支拐杖+一張紙條，先至搵到人幫，諷刺！