仿真娃娃

3叔姐上緊“陪月員基礎證書”班，就快上完，然後要考試，合格就可以被安排搵顧主……不過佢未讀完就已經有“顧主”請，就係Mon姐！

陪月課程入面除咗教照顧媽咪，最重要梗係學習點照顧BB啦！3叔姐見上堂時講員有個假B攞出黎示範沖涼、清潔、抱抱等等，佢特別搵人（即係我）幫佢淘個仿真娃娃，可以響屋企練習，考試就唔使怕啦！

先淘戴帽B，大得滯兼無分性別，於是再淘細B男、女仔各一

我影影下3叔姐忍唔住影埋一份

Butterfield's

Buffet @Butterfield's

多謝康表哥早前安排咗一個好有意義嘅聚會響Butterfield's，名義係補祝3叔姐生日，順道亦讓兩老表嫂/表妹響做媽媽之前見個面，交流心得、互相勉勵。兩個準媽媽：Cindy預產期就快到，Mon姐就響出年2月中。響e度預祝兩位：一切順利！

為咗迎接新生命，一家大細已經開始忙碌，例如搜集日常用品啦，好似BB床、BB車、袍仔、毛巾等等，小牛小嵐用完唔用嘅梗係接收啦！同事朋友新嘅舊嘅陸續送黎梗係要啦！多謝！

此外，3叔姐仲略嫌之前讀過嘅家務助理之陪月課程未夠班，正式報讀陪月員技能課程，準備親自陪月！慢慢再講……

香港郊遊 + 大自然生態 行玩拍 終極天書

今日行大眾搵到一本正書，圖文並茂、路線清晰咁介紹香港郊遊點，1星至5星都有，值得推薦比同路中人：

《別相信任何人》（Before I Go to Sleep）/《星際啟示錄》（Interstellar）

一連睇咗兩套戲。

睇《別相信任何人》因為Mon姐借本書比我睇，每晚瞓前睇，Before I go to sleep 吖嘛，點知睇兩頁就瞓著，睇咗好多晚都睇唔完，不過又想知結局，所以…

套戲都好忠於原著，即係話，一樣咁眼瞓！好彩，係Nicole Kidman 做，淨睇佢已經抵番晒。結局…估到啦！不過估唔到佢幾暴力！ - 45分

睇《星際啟示錄》因為廣告吸引。劇情唔好提，e類科幻片嘅劇情講咗都唔明！不過其中有3場戲好精彩，一場響海度遇到山咁高嘅浪、一場穿越d冰雲、一場進入個蟲洞。套戲超過3個鐘，長得滯！ - 55分

元朗下白泥 - 影日落

想去下白泥好耐，因為未去過嘅都話下白泥影日落好靚！上網睇人地d相，一片泥灘、斜陽映照、一幅幅倒影相片……極吸引。

不過，靚唔靚，睇唔睇到，都好受好多因素影響，例如日落時間、潮汐漲退、打風落雨、天陰天晴……今日，就比『好多車』影響攝影結果。今日嘅車多到你無得選擇，女婿同侄仔開兩部車，去到一個避車處，再想行多步都唔得，因為對頭車迎面而黎，咄咄迫人，各不相讓！侄仔叫：“3叔！你唔好理我地，快d影喇！”

快d影喇，天文台話日落17:40，我第一張相係17:24先至開始影！

深圳灣大橋

曝光補償-1.5

因為收細兩級光圈，所以紅d

17:31 太陽開始呈現兩種顏色

侄仔話如果水退，我地係可以行去對面淺灘

曝光補償-2.5

又影到太陽前面d黑點

17:35個太陽只能隱約可見

佢都趁天黑前快d飛返屋企

前面后海灣，對面深圳

回程出到流浮山已經天黑晒

 響明記dinner，每人$297，都唔算一頸血

兩個侄孫又大咗好多

食完飯再出碼頭睇下，見到深圳灣大橋，同埋深圳放煙花

有d失望，一張濕地相都影唔到！下次有機會再去！