公司又少咗一個未結婚嘅靚女！
“啤花”今日響“上水雙魚河賽馬會鄉村俱樂部”舉行婚宴，事前天氣報告話間中有狂風雷暴，好彩，今日上水一滴雨都無，除咗有少少酷熱同想中暑嘅感覺之外，一切安排都好正，好pro，馬會即係馬會。
我去過淺水灣 、黃金海岸同今次嘅上水雙魚河馬會，e處地方最大，服務最好。
有件趣事，d椅越坐越矮，因為椅腳插入泥度，越插越入，所以越坐越矮。
Mon 姐同朋友試過響東大街新開嘅“千福大少”之後返黎，comment 唔錯，其中，佢話淨係睇靚女服務員都抵晒。
上網check openrice 都未有資料。
剛好3叔姐今日唔想煮飯，去試下！
叫咗海南雞飯 n 咖哩魚柳飯，結果海南雞飯好食D，咖哩都唔錯；送兩杯咖啡，可惜漏咗氣，麻麻地；至於服務員……Mon 姐真係有眼光，唔錯唔錯！靚之外，仲好有禮貌。
我通常試過一間食肆之後都會問3叔姐：仲有無下次？答案係：有
當日Mon姐出世，帶比我同3叔姐無比嘅滿足。Mon姐乖、得意、可愛、純品……我地決定唔生第2個，因為唔想分薄我地比Mon姐嘅一砌。
不過對Mon黎講，面對母親節、父親節、或者父母親生日等等要表現孝順嘅日子，要獨力支持，又相當吃力。其他人有兄弟姊妹分擔，佢無。所以每次有ed日子我同3叔姐都無特別要求，真係有故欣然無亦喜。何況乜節物節都係d商人搵錢嘅機會。
不過Mon姐都盡佢責任，今日10點前就約埋朱古力去"翅福"搵定位等我地落去。我同3叔姐都好安慰，又見到隔離兩枱都係老人家開定位等後生嘅情景，知道Mon姐e番心意真係要好好珍惜。
Thank you
時間：20+年前
地點：土瓜灣樂民村街市仔舊書檔
人物：3叔公、Mon 姐、書檔事頭婆
話說3叔公一家去樂民村探姨媽，坐得悶悶地，知道Mon姐好鍾意睇叮噹漫畫，走落街睇下舊書檔有無得賣。正，有叮噹。
3叔公：買两本睇住先好無?
Mon姐：好!
書檔事頭婆：妹妹，你阿哥真係錫你喇!
Mon姐：@#&%(唔記得佢講乜)
—————————————
時間：上星期
地點：吉之島山頭火
人物：3叔公、Mon姐、山頭火收銀
話說3叔姐有約，3叔公於是約咗Mon姐放工一齊食飯，最後揀咗山頭火，食咗两個套餐，其中我個餐豪d，有剌身跟。食飽埋單：
山頭火收銀：多謝$210
3叔公：哦，我得$190，阿女，你出$20吖！
山頭火收銀：(面有懷疑) 阿女? 佢係你個女?
Mon姐：係呀! 佢係我老豆呀!
山頭火收銀 : 佢咁後生！
3叔公：你真係信呀？
山頭火收銀 : 係啦！(一副得戚樣) 我都話唔似啦！
