打完風入大嶼山

(模擬照片，有支棟就快倒下，好危險，棟，即係電話柱 (telephone pole)，通常綠色，響新界及離島比較易見到)

聽到上司講，今次場風 (已經唔記得邊場颱風) 掃低大嶼山同長洲好多電話線，中環同事要去幫，邊個邊個去大嶼山，邊個邊個去長洲....（我就做完大嶼山再去長洲，第一晚收工都唔返屋企瞓，響長洲海事處 office d 椅度瞓，第日一早又做過！）

去到大嶼山派咗我跟 Leslie (花名)，好有型，著人字拖，揸架棉羊仔，叫聲我坐穩，卜卜卜卜咁就由梅窩機樓出發，我坐後面，背住架生袋，拿著兩大"滾"線，都無手扶住.....第一次坐棉羊仔，第一次去大嶼山做科佬，個體驗都好得意。

張Order係去一條村，得10伙人，9個電話壞咗，差d同外界無哂聯絡，去到，兩條友分工合作，一人爬一支棟，逐駁逐駁，駁番d線，或者放過條新線。Leslie 身手不凡，著住人字拖，爬得快過我，我慢好多，因為爬唔慣，得舖牛力，無乜技巧.........爬到上去，扣住安全帶，雙腳撑住 pole step，雙手在駁線，眼就四圍望，高高在上，好high架........帶去d線用哂，要第日再黎，結果兩日做好，村民都好感激我地。有飲有食之外，仲有大包自家曬梅菜帶走。

兩日內十幾team同事已經修復哂d電話，但都未完工，再用多幾日4圍檢查有無危棟。講真，電話公司以前服務好好架。