鴨脷洲街市食瀨尿蝦

寶榮介紹過鴨脷洲街市好多次。今日同佢兩公婆響海都飲完茶，去到數碼港又無套戲好睇，唯有跟佢地入鴨脷洲一次。

去到街市，響魚檔區繞場一週，真係好多選擇，魚蝦蟹樣樣齊。終於$48買左斤瀨尿蝦，有手掌短少少咁大隻，足有廿隻咁多，上樓上耀記咖啡交比老細蒸。

真奇怪，咖啡檔幫你蒸蝦？無錯，原來鴨脷洲街市特色就係：樓下街市買料，樓上茶檔同你整，油水錢廿零三十蚊一味，計起上尼，又平又靚。見到佢地3個人6隻手(包括3叔姐)，兩三個回合，枱上得番一堆蝦殼。3叔姐初初話瀨尿蝦好難 meet 殼，但經寶榮教路，easy哂。我問3叔姐好唔好食，佢話好大舊肉(因為識左碌殼)，好鮮甜，好原味... d 蝦係乜都無落，就咁蒸熟咋！

我無食瀨尿蝦，只係飲左杯凍O茶走甜。


p.s.順路兜一兜"南灣"，又係一排霸晒海景既樓。$18,000一呎