政府工 - 鐵飯碗

做公務員或者打政府工相信唔容易，好似近期幾位打政府工嘅人士：曾特首比人“中”、財政司比人“夾”、教育局長因為英皇事件比人登報叫下台、首席顧問“臨界點”出咗口即刻“領野”收番都收唔切，後果堪輿.....

公務員通常都係鐵飯碗，無乜嚴重失職都唔會炒，有病有痛更加會被保護。我曾經聽過一個患過精神病but康複咗嘅公務員（我比個名佢叫阿權）嘅故事：

話說阿權康複後被安排到某部門做文職工作，到步後所有同事對佢都唔錯，而且已經被知會唔好刺激佢，由得佢無驚無險，日日放5點就算。阿權坐阿May隔離，兩人每人都有一個電話，但要共用一個號碼，即係其中一個用緊另一個就無得用，或者兩個一齊同對方講都得。

阿權好鍾意傾電話，成日打電話出街，對方似乎次次都唔同人，初期阿May唔多理佢，但係發覺阿權唔係講公事，忍下忍下同阿權講：你唔好成日講電話啦！我有時想用都唔得。阿權初初真係用少咗，點知過咗一排又黎過。阿May忍無可忍，有一次趁阿權又講電話，就攞起佢自己個分機想叫佢收線........點知阿May一聽，由頭到尾都係得阿權自己響度講野！

結果阿權有無被炒？梗係無啦，不過阿May唔做姐！