如此惡劣嘅環境

連續3個星期六（包括5月17日公眾假期），返公司都處於惡劣嘅環境做野。

公司要安裝一部發電機上天台，而敝部門位於頂層，平時一至五當然唔比工人開工，但係，一到星期六日同公眾假期，d工人就要把握時間，做到兵兵砰砰，特別係鑽野，可以講，由朝鑽到6點。試想下，你屋企樓上裝修，你住樓下嘅會唔會安寧！





我都好佩服自己，咁惡劣嘅環境都照做。當然，同我一齊犧牲假期照返工嘅貞姐都無得頂！

我曾經同老闆講，我做到e家已經無晒上進心，不過，我仲有嘅係責任心。睇住d野做唔晒，我就會勤力d，多走一步，除咗星期日唔返，其餘日子日日都返，包括星期六、公眾假期同埋如果annual leave無街去都返。

有d同事，日日話好忙，好多野做，但係放工夠鐘就走。e家工作時間每星期40個鐘，我相信如果公司改為每星期返30個鐘，佢地照舊一d都唔肯犧牲，照返30個鐘，然後叫得更大聲：好多野做呀！咁多野叫人點做呀！請人啦！搵其他人幫手啦，再assign過target同account啦.........

做野唔係咁做囉，比咗個target你果team，基本上你就要死掂佢，人，無得加！你唔可以成日叫忙成日叫人幫，幫你果個人唔通唔使放假？淨係你至可以放假？淨係你至有仔女？淨係你至好攰要去揼骨？

其實我自己發洩下啫！因為問題好易解決：唔做咪得囉！