結婚相(5) 特別婚禮

影結婚相事前知道個 rundown好緊要，特別係影教堂。教堂行禮一般有採排，切記出席，因為每間教堂都有禁地，通常個台唔上得，有d嚴到凡紅地毯都唔比踩 (唔比影相佬踩)，有次影堅道總堂，除咗戴介指揭頭紗之外，大部份時間都要用支300影。

有d儀式都好特別，例如神道教，接新娘返到女家，乜都唔做，打開個神櫃，跪哂響度唸完經先。

又影過水上人結婚，一架大蝦艇去接新娘，認真豪。夜晚擺酒響珍寶海鮮舫，菜式同出面酒樓差唔多，但係條魚就好特別，圍圍唔同款，唔同大細，仲有圍一條大d，有圍兩條細d，主家席兩條就最正，應該係立魚，瞓響度都4,5吋厚。原來水上人通常自來魚，網到乜食乜，總之唔食養嘅。

試過響圍村擺酒，到會，八張大枱，分頭圍尾圍，個新郎新娘反而有得坐低食，因為黎飲班友仔志在隊酒，理得你邊個結婚，好唔鍾意影相。食食下最驚就係突然燒串炮仗，無事先張揚，但係班村民無個驚。我見有隻狗都氣定神閒，若無其事？串炮仗好長喎！新娘話隻狗一早已經聾咗。