年三十晚，想起阿媽

今日又係年三十晚。

每逢年三十晚都要幫阿媽拜神，然後食團年飯，食完等過咗12點又拜一次。阿媽天生孤寒，但用於買祭品燒衣就絕不手軟。

每次拜神都係一場超級大龍鳳，元寶16份、臘燭16對、細香16注、大香3支、金銀衣紙兩袋、仲有好多貴人、地衣等等等等，屋企有天神、灶君、黃大仙、關帝、祖先、阿爺、阿嫲、老豆、地主、？？、土地、門神、仲有4份阿媽d阿公阿婆外公外婆；祭品包括雞、燒肉、飯、酒… 漏咗一份，就係樓下土地..... 一屋都係仲未夠，仲要拜埋樓下土地公。

一落樓下阿媽就好自豪，因為d街坊實讚佢個仔孝順，又乖，肯幫阿媽拜神。

表面好乖，但係你估我想咩？唔通睇住佢幾十歲鐘吓鐘吓咁燒咩？一係就跌親，一係隨時連屋都燒埋。拜神好煙！好污染！又燒錢！拜完D雞同燒肉阿媽仲要食晒佢。曾經有次成功說服阿媽信耶穌啦，唔好再拜神喇，既燒錢，又辛苦，信耶穌乾手淨腳。可惜講完有日佢撞到個頭腫晒，佢話係懲罰，以後唔準我再提。

同牧師講開，佢話無辦法喇，根深蒂固，幫梗要幫啦，不過祈禱囉，拜嘅時候祈禱先，同埋唔好做任何拜祭嘅動作，就咁攞去燒完就算。

今晚突然想起阿媽，3年無燒喇！